İşgüzar səfər çərçivəsində ER xarici işlər naziri Ararat Mirzoyan Estoniyanın Parlamentinin prezidenti Lauri Hussar ilə görüşüb. Görüşdə Ermənistan-Estoniya parlament dostluq qrupunun sədri Marti Raydma da iştirak edib. Bu barədə ER XİN məlumat yayıb.
Tərəflər ikitərəfli gündəliyin məsələlərini, o cümlədən regional hadisələri müzakirə ediblər.
“Ölkələrimiz və xalqlarımız arasında münasibətlər tarixi bağlara, dostluğa, fundamental prinsiplərin qiymətləndirilməsinə əsaslanır və çağırışlarla dolu indiki dövrdə bu əlaqələrin daha da dərinləşdirilməsi də çox vacib”, – XİN rəhbəri Mirzoyan vurğulayıb.
Nazir Mirzoyan Ermənistanda demokratik islahatların gedişini, əldə olunan uğurları təqdim edib, Estoniyaya bu yolda göstərdiyi dəstəyə görə təşəkkür edib.
“Ermənistan vətəndaşları öz seçimini edib və hökumət islahatları, o cümlədən həmfikir tərəfdaşlarla sıx əməkdaşlıq şəraitində davam etdirmək əzmindədir”, – deyə Ararat Mirzoyan əlavə edib.
Ermənistan Respublikasının xarici işlər naziri və Estoniya parlamentinin sədri Ermənistan Respublikası ilə Aİ arasında tərəfdaşlığın gündəliyi və münasibətlərin dərinləşdirilməsi istiqamətində atılan addımlar barədə də fikir mübadiləsi aparıblar.
Tərəflər regional təhlükəsizlik məsələlərinə də toxunublar. Nazir Mirzoyan həmsöhbətinə qonşularla münasibətlərin normallaşması prosesini, o cümlədən Ermənistan və Azərbaycan arasında sülh müqaviləsinin bağlanmasının vacibliyini təqdim edib.
