İran və Ermənistan arasındakı əlaqələr bu iki ölkənin coğrafi və strateji mövqeyinə görə xüsusi əhəmiyyət kəsb edir. İranın qonşularından biri olaraq Ermənistan regional təhlükəsizliyin möhkəmləndirilməsində mühüm rol oynayan təhlükəsiz və sabit sərhədə malikdir.
Bu barədə İranın SNN agentliyi yazır. İki ölkə arasında iqtisadi, enerji və təhsil sahəsində əməkdaşlığın ikitərəfli əlaqələrin möhkəmlənməsinə və iqtisadi inkişafa töhfə verəcəyi qeyd olunur.
Yol tikintisi, qaz və elektrik enerjisi mübadiləsinin genişləndirilməsi kimi birgə infrastruktur və enerji layihələri regional infrastrukturun yaxşılaşdırılmasına və qarşılıqlı ehtiyacların ödənilməsinə töhfə verir.
İranla Ermənistanın iki qonşu ölkə kimi münasibətləri daima strateji əhəmiyyət kəsb edib. Bu əlaqələr iki ölkə arasında ən böyük müqavilənin imzalanması ilə pik həddə çatdı.
İran İslam Respublikasının səfiri Mehdi Sobhani agentliyə verdiyi eksklüziv müsahibəsində bu sazişdən və iki ölkə arasında əməkdaşlığın digər nailiyyətlərindən danışıb.
“Mən bir ilə yaxındır ki, İrəvandayam və bu müddət ərzində biz İranla Ermənistan arasında münasibətlərdə mühüm irəliləyiş əldə edə bilmişik. Ermənistan bizim qonşularımızdan biridir və bizimlə 46 km-lik sərhədi var ki, bu da ən təhlükəsiz sərhədlərdən biridir.
Ermənilərlə tarixi əlaqələrimiz çox müsbət və aydın olub və Ermənistan müstəqillik əldə etdikdən sonra əməkdaşlıq prosesinin daim artdığını deyən səfir qeyd edib ki, biz ötən il Ermənistanın müstəqillik əldə etdiyi vaxtdan bəri Ermənistan hökuməti ilə ən böyük sazişi imzalamağa nail olmuşuq.
“Bu müqavilə Ermənistanın Cənub hissəsində Şimal-Cənub dəhlizinin marşrutu üzərində yerləşən Aqarak-Kacaran yolunun tikintisinə aiddir.
Bu layihə 212 milyon dollar dəyərindədir və İran İslam Respublikasının texniki və mühəndislik xidmətlərinin Ermənistana ixracına böyük töhfə verir.
Bu, yolu bir saat 20 dəqiqədən 20 dəqiqəyə, yolun enini isə 6 metrdən 17 metrə endirir ki, bu da təhlükəsizlik və sürət baxımından çox faydalıdır.
Bizim Ermənistanın müxtəlif yerlərində başqa kiçik layihələrimiz, 36 milyon dollarlıq sərmayəmiz var” – deyən Sobhani ticarət sahəsində Ermənistanla ticarət dövriyyəsini 200 milyon dollardan 711 milyon dollara çatdıra bildiklərini bildirib.
3 milyon əhalisi olan Ermənistan Avrasiya İttifaqının üzvüdür ki, bu da ölkəni 200 milyonluq Avrasiya bazarı üçün platformaya çevirib.
O, həmçinin bildirib ki, İranın Ermənistana qaz ixracı yaxın gələcəkdə iki dəfə artacaq. “Uğurlarımızdan biri iki ölkə arasında qaz və elektrik enerjisi sazişinin 2030-cu ilə qədər uzadılması oldu.
Biz hər il Ermənistana 360 milyon kubmetr qaz ixrac edirik, əvəzində isə elektrik enerjisi idxal edirik. Həmçinin, biz Ermənistandan İrana üçüncü elektrik ötürücü xəttini demək olar ki, son mərhələyə çatdıra bildik ki, o da yaxın aylarda istifadəyə veriləcək və biz Ermənistandan elektrik enerjisi idxalını iki dəfə artıra bilərik” – deyərək İran səfiri bildirib.
Mətn factor.am-ə məxsusdur
