Azərbaycanın energetika nazirinin müavini Elnur Soltanov Ermənistanda AES-in bağlanmasından təəccübləndiyini bildirib və “istifadə olunan texnologiyaların bəziləri ilə bağlı narahatlıqlara” işarə edib.
O, “atom elektrik stansiyasının dünya standartlarına cavab verməyə bilər” deyərək qəza baş verəcəyi təqdirdə “təkcə Ermənistanın zərər görməyəcəyini” vurğulayıb.
Qeyd edək ki, avqustun 30-da axşam saatlarında məlum olub ki, Metsamor Atom Elektrik Stansiyası fövqəladə dayandırma rejimində enerji sistemindən ayrılıb. Dayanmaya səbəb ildırım vurması olub, nəticədə stansiyanın təhlükəsizlik sistemləri stansiyanı təhlükəsiz dayanma rejiminə gətirib.
Bununla belə, Ermənistan AES-i yenidən enerji sisteminə qoşulub və tam gücü ilə işə başlayıb.
“Təhlükəsizlik sistemləri çox həssasdır və istənilən vəziyyətə reaksiya verir. Bu, son illər aparılan genişmiqyaslı modernləşdirmə işlərinin, o cümlədən mühafizə sistemlərinin səmərəli olduğuna və gözlənilən nəticəni verdiyinə daha bir sübutdur”, – deyə Ərazi İdarəetmə Nazirliyindən əmin ediblər.
