Avropa İttifaqı Ermənistan hökumətinin təqdim etdiyi “Sülhün kəsişməsi” layihəsini alqışlayıb və onun həyata keçirilməsi üçün Ermənistan və regiondakı tərəfdaşları ilə fəal işləyir.
Bu barədə Aİ-nin Ermənistandakı nümayəndəliyinin rəhbəri, fövqəladə və səlahiyyətli səfir Vasilis Maraqos “Sülhün kəsişməsi: Təhlükəsizlik və demokratiyanı birləşdirərək” adlı forumda bildirib.
O, konfransa hazırlığın onda böyük təəssürat yaratdığını qeyd edib, “Konrad Adenauer” Fondunu və onların digər tərəfdaşlarını təbrik edib, bu təşəbbüsü və prosesi “çox vacib” adlandırıb.
“Dərhal vurğulamaq istərdim ki, tərəfdaşlıq şurasının nazir Mirzoyanın da iştirak etdiyi iclasında məqsədi sülh və normal şərait yaratmaq olan bu təşəbbüs müsbət qarşılanıb. Bu təşəbüsün məqsədi “Sülhün kəsişməsi” layihəsinin əsasını təşkil edən milli yurisdiksiya prinsiplərini qoruyub saxlamaqla və eyni zamanda qarşılıqlılığı təmin etməklə regionda sülh və normal münasibətlər yaratmaq, həmçinin nəqliyyat yollarını açmaqdır. Keçən ilin oktyabrında baş nazir bu təşəbbüsü təqdim edəndə mən də orada idim. Biz bunu alqışladıq və təşəbbüsü həyata keçirmək üçün Ermənistan və regiondakı bütün tərəfdaşlarımızla fəal işləyirik”, – deyə Vasilis Maraqos bildirib.
