Ermənistanın Mədəniyyət Günləri Qazaxıstanda keçiriləcək
Ermənistan Respublikasının Təhsil, Elm, Mədəniyyət və İdman naziri Janna Andreasyan 14-16 oktyabr tarixlərində Ermənistan Prezidenti Vahaqn Xaçatryanın Qazaxıstana etdiyi rəsmi səfər çərçivəsində nümayəndə heyətinin tərkibində Astanaya gedib.
O, Qazaxıstanda keçirilən Ermənistanın Mədəniyyət Günləri tədbirlərində iştirak edəcək.
Ermənistanın Təhsil, Elm, Mədəniyyət və İdman nazirliyindən verilən məlumata görə, mədəniyyət günlərinin proqramında bir sıra tədbirlər nəzərdə tutulub.
Bunlara Ermənistan caz orkestrinin (bədii rəhbər David Melkonyan) iştirakı ilə təntənəli konsert, Serqey Paracanova həsr olunmuş foto sərgi, Ermənistan kinosu günləri və Sos Sarkisyan adına “Hamazğayin” teatrının (bədii rəhbər Narine Qriqoryan) qastrol tamaşası daxildir.
Ermənistanın Mədəniyyət Günlərinin əsas tədbirləri Qazaxıstanın Kalibek Kuanışbayev adına Milli Musiqili Dram Teatrında keçiriləcək.
15 oktyabrda mədəniyyət günlərinin açılışına həsr olunmuş təntənəli konsert keçiriləcək. Bu konsert Şarl Aznavurun 100 illiyinə həsr olunub.
Konsert proqramında əsasən məşhur şansonun mahnıları, eləcə də Komitas və Arno Babacanyanın əsərləri səslənəcək. Ermənistan caz orkestri ilə yanaşı, Ermənistanın əməkdar artisti İnqa Arşakyan və beynəlxalq müsabiqələrin laureatı Qor Sujyan da çıxış edəcəklər.
Eyni gündə teatrın foyesində Serqey Paracanov muzeyi tərəfindən hazırlanmış Sergey Paracanovun həyatına və fəaliyyətinə həsr olunmuş foto sərgi açılacaq.
Ertəsi gün, 16 oktyabrda Qazaxıstanın Kalibek Kuanışbayev adına Milli Musiqili Dram Teatrında Sos Sarkisyan adına “Hamazğayin” teatrı “Lu Büöf” tamaşası ilə çıxış edəcək.
Qazaxıstanda keçirilən Ermənistanın Mədəniyyət Günləri çərçivəsində 7 IMAX KERUEN kinoteatrında Ermənistanın bədii və animasiya filmləri nümayiş etdiriləcəkdir.
