Ermənistan və Azərbaycan arasında Sülh Müqaviləsi BMT-nin iqlim məsələləri üzrə noyabrda keçiriləcək sammitindən əvvəl imzalana bilər.
Bu barədə Ermənistan prezidenti Vaaqn Xaçatryan “Financial Times” nəşrinə verdiyi müsahibədə bildirib. O əlavə edib ki, hələ də təcili həll tələb edən məsələlər mövcuddur.
“Müzakirələrin sonuna yaxınlaşırıq. COP29-dan əvvəl imzalamaq yaxşı olardı, lakin tələsməyək” – deyə Xaçatryan bildirib.
Ötən ay Azərbaycan digər ölkələri siyasi problemləri aradan qaldırmağa, birləşməyə və noyabrda atəşkəs elan etməyə çağırmışdı.
“Financial Times” xatırladır ki, Azərbaycan bu ilin dekabrında keçiriləcək COP sammitinə ev sahibliyi edəcək, bu isə Dağlıq Qarabağ üzərində nəzarəti bərpa etməsindən bir neçə ay sonra baş verir.
Əvvəlcə Ermənistan Azərbaycanın namizədliyinə veto qoymuşdu, lakin Bakının 30-dan çox erməni hərbi əsirini qaytarmasından sonra vetonu geri çəkdi.
Xaçatryanın sözlərinə görə, hərbi əsirlərlə bağlı danışıqlar sülh müqaviləsinin bir hissəsi deyil, lakin hələ də gündəmdə qalır.
O, əlavə edib ki, Ermənistanın yalnız Azərbaycanla deyil, bütün qonşu ölkələrlə sülhü təmin etməsi lazımdır.
Ermənistan prezidenti bildirib ki, 2023-cü ilin sentyabrında Dağlıq Qarabağa hücumdan sonra 100.000-dən çox qaçqın Ermənistana köçüb və onların inteqrasiyası hələ də davam edir.
Ermənistan, həmçinin, Livandan köçməyə məcbur olan erməniləri qəbul etməyə hazırdır. “Biz onları qəbul etməyə hazır olmalıyıq” – deyə Xaçatryan vurğulayıb.
O, həmçinin qeyd edib ki, Ermənistan və Avropa İttifaqı oxşar dəyərləri paylaşır və AB missiyası Azərbaycanla sərhəddə vəziyyətin sabitləşməsinə töhfə verib.
