Erməni mədəniyyəti Türkməənistanda nümayiş olunur
Türkmənistanın paytaxtı Aşqabadda “Ermənistan Mədəniyyət Günləri” adlı tədbir keçirilir. Ermənistanın mədəniyyət nümayəndə heyətinə Ermənistan Respublikasının Elm, Təhsil, Mədəniyyət və İdman nazirinin müavini Daniel Danielyan rəhbərlik edir.
Alınan məlumata görə, Ermənistanın Elm, Təhsil, Mədəniyyət və İdman nazirliyi bildirir ki, oktyabrın 28-də Mədəniyyət günlərinin açılışı Altunyan Dövlət Ansamblının konserti və Sergey Paracanova həsr olunmuş foto sərgisi ilə başlanıb.
Mədəniyyət günlərinin açılışı Türkmənistan Dövlət Mədəniyyət Mərkəzinin “Muğamlar” konsert zalındakeçirilib. Sərgi də həmin mərkəzin foyesində sənətsevər ictimaiyyətə təqdim edilib.
Tədbirin açılışında Ermənistan Respublikasının Elm, Təhsil, Mədəniyyət və İdman nazirinin müavini Daniel Danielyan və Türkmənistanın mədəniyyət nazirinin müavini Nursaxet Şirimov təbrik nitqi ilə çıxış ediblər.
Daniel Danielyan, erməni-türkmən münasibətlərinin inkişafına toxunaraq, səmimi qəbula və Türkmənistanda Ermənistan Mədəniyyət Günlərinə ev sahibliyi etdiklərinə görə Türkmənistan Mədəniyyət nazirliyinə təşəkkürünü bildirib.
Onun sözlərinə görə, bu əlamətdar hadisə millətlər arasında güclü əlaqələr qurmaq və milli mədəniyyəti daha geniş dairələrə tanıtmaq məqsədilə mədəni əməkdaşlığın yenidən qiymətləndirilməsi üçün bir səy kimi dəyərləndirilə bilər.
Mədəniyyət günləri çərçivəsində “Aşqabad” və “Vatan” kinoteatrlarında Ermənistan Kinosu Günləri keçiriləcək, burada “Göyün Bir Parçası”, “Ata”, “Bağdasar Arvadından Ayrılır” adlı tammetrajlı filmlər, həmçinin “İt və Pişik”, “Mavi Dənizdə Ağ köpüklərin içində”, “Bal damlası”, “Hər Axşam” və “Sehrli Göyqurşağı” cizgi filmləri nümayiş etdiriləcək.
Türkmənistana səfəri zamanı Daniel Danielyan Türkmənistanın Mədəniyyət naziri Atageldi Şamuradovla da görüşəcək.
Ermənistanın mədəniyyət nümayəndə heyəti, nazir müavini Daniel Danielyanın rəhbərliyi ilə Türkmənistanın “Maxtumqulu Fragi” kompleksi, “Qədim Nisa” qalası, Türkmənistan Dövlət və Xalçalar Milli Muzeyləri, eləcə də Türkmənistanın İncəsənət Muzeyi kimi mədəniyyət məkanlarına ziyarət edib.
