Bakı COP29 ilə bağlı Avropa Parlamentinin qətnaməsinin mahiyyətini təhrif edib
Bakıda bir neçə gün əvvəl Avropa Parlamentində COP29 ilə bağlı texniki xarakterli qətnamənin qəbulunu qələbə kimi qiymətləndiriblər.
Halbuki, həmin qətnamədə Avropa Parlamenti Azərbaycanda insan hüquqları sahəsindəki vəziyyətlə bağlı bir daha ciddi narahatlıq ifadə edir və bundan əvvəl qəbul edilmiş, çox sərt və tənqidi olan bütün qətnamələrə, o cümlədən sonuncu qətnaməyə istinad edir.
Brüsseldə Armenpress-in müxbirinin verdiyi məlumata görə, COP29 ilə bağlı qətnamə və orada əks olunmuş müddəalar Azərbaycanın səfir müavini Anar Şükürov tərəfindən təhrif edilib və bu barədə yanlış məlumat yayılıb.
Şükürov “X” sosial şəbəkəsindəki mikrobloqunda bildirib ki, guya Fransanı təmsil edən avroparlamentar Nathalie Loiseau və bir neçə digər deputat tərəfindən təqdim edilmiş Dağlıq Qarabağda baş verənlər və Azərbaycanın Ermənistana davam edən təhdidləri ilə bağlı təkliflər səsvermə zamanı rədd edilib və qətnaməyə daxil edilməyib.
Halbuki, bu təkliflər ümumiyyətlə plenar iclasda müzakirə olunmayıb və səsverməyə çıxarılmayıb.
Əslində, qətnamədə deputatlar bir daha narahatlıqlarını ifadə edir və Azərbaycana bütün siyasi məhbusların, hüquq müdafiəçilərinin və jurnalistlərin hüquqlarını qorumağa, onları dərhal və qeyd-şərtsiz azad etməyə çağırış edirlər.
Avropa Parlamenti öz mövqeyində qətiyyətlidir: Azərbaycanla bütün tərəfdaşlıq sazişləri yuxarıda qeyd olunanların və ölkədə insan hüquqlarının ümumi vəziyyətinin yaxşılaşdırılması ilə şərtləndirilməlidir.
Qətnamə həmçinin Avropa İttifaqına COP29-u Azərbaycanı beynəlxalq öhdəliklərini xatırlatmaq və onun insan hüquqlarını pozmasını qınamaq üçün bir fürsət olaraq istifadə etməyə çağırır.
COP29 ilə bağlı qəbul edilmiş qətnamədə Azərbaycan ekologiya və təbii ehtiyatlar naziri Muxtar Babayevin, nazir olmamışdan əvvəl 26 il Azərbaycan Dövlət Neft Şirkətində çalışması ilə əlaqədar ciddi narahatlıq ifadə olunur və onun COP29-un prezidenti təyin edilməsi tənqid edilir.
Qətnamə həmçinin Azərbaycanın prezidenti İlham Əliyevin, fosil yanacaqlarla zəngin ölkələrin maraqlarını qorumağa davam edəcəyinə dair bəyanatlarını diqqətdən kənarda qoymayıb.
Avropa Parlamentinin deputatları Avropa Komissiyasını və AB üzv dövlətlərini gələcək COP prezidentliklərinin maraqlar toqquşmasından azad olmasını təmin etmək üçün bütün zəruri tədbirləri görməyə çağırır.
