Türkiyə 2022-ci ildə qəbul edilmiş “dezinformasiya haqqında qanun” əsasında 4590 istintaq başladıb və 33 nəfəri həbs edib.
Bu barədə Stockholm Center for Freedom-un xəbərinə görə, Medianın və Hüququn Tədqiqatları Assosiasiyası məlumat yayıb.
Parlamentin Ədliyyə Komissiyasının iclasında açıqlanan məlumatlar göstərib ki, yeni qanunun qəbulundan sonra son iki ildə hadisələrin sayı artıb.
Hakimiyyət 2022-ci ildə 216 nəfərin iştirakı ilə 139 istintaq aparıb, 2023-cü ildə bu rəqəm artıq 2381 olub, 2024-cü ilin oktyabrına qədər isə 1668 iş qeydə alınıb.
Yeni qanun “yalan məlumatların”yayılmasını cinayət hesab edir. Tənqidçilər qanunun qeyri-müəyyən tərtibatının hakimiyyətə jurnalistləri, aktivistləri və müxalif şəxsləri özbaşına hədəfə almağa imkan verdiyini bildirirlər.
2023-cü ildə Konstitusiya Məhkəməsi qanunun ləğvi ilə bağlı şikayətləri rədd edib. Qeyd edilir ki, qanunun qəbulundan sonra ən azı 56 jurnalist, redaktor və media rəhbəri təqibə məruz qalıb.
Hədəfə alınanlar arasında Mezopotamya agentliyindən Əhməd Kanbal, BirGün-dən İsmayıl Ar və 23 Derece-dən Gökhan Özbek də var.
“Bu tənzimləmə ictimai qaydanı qorumaq üçün deyil, senzura məqsədi daşıyır. Biz mübarizəmizi davam etdirəcəyik və jurnalistika prinsiplərini qoruyacağıq” – deyə Kanbal bildirib.
Bir sıra jurnalistlər, məsələn, Halk TV-dən Dinçer Gökçen və Gazete Pencere-dən Nilay Can həbs edilib, lakin sonradan azadlığa buraxılıb.
Digərləri, o cümlədən Bitlis News-dan Sinan Aygyül və Mutlu Şehir Osmaniye-dən qardaşlar Əli və İbrahim İmatlar həbsdə saxlanılır.
Parlamentdə səsləndirilən bu məlumatlara baxmayaraq, Ədliyyə nazirliyi ictimaiyyətə statistik məlumat paylaşmayıb. Vətəndaş cəmiyyəti və media tərəfindən təkrar informasiya sorğuları rədd edilib.
Parlamentdə bu məlumatları paylaşan hakim Ədalət və İnkişaf Partiyasının (AKP) millət vəkili Nurəddin Alan izahat tələblərinə cavab verməyib.
Beynəlxalq təşkilatlar, o cümlədən Jurnalistləri Müdafiə Komitəsi (CPJ) və Sərhədsiz Reportyorlar (RSF) qanunun ləğv edilməsinə çağıraraq, onun ifadə azadlığına məhdudlaşdırıcı təsiri barədə xəbərdarlıq ediblər.
