Ermənistanın Xarici işlər naziri Ararat Mirzoyan Kollektiv Təhlükəsizlik Müqaviləsi Təşkilatının (KTMT) Xarici işlər nazirlərinin, Müdafiə nazirlərinin və Təhlükəsizlik Şurası katiblərinin birgə iclasında iştirak etməyəcək.
Bu barədə Ermənistanın Xarici işlər nazirliyinin mətbuat katibi Ani Badalyan Ermənistanın İctimai Radiosuna bildirib.
Kollektiv Təhlükəsizlik Müqaviləsi Təşkilatının Xarici işlər nazirlərinin, Müdafiə nazirlərinin və Təhlükəsizlik Şurası katiblərinin birgə iclası noyabrın 28-də Astanada keçiriləcək.
İclasda KTMT-nin baş katibi İmangali Tasmagambetov və birgə qərargahın rəhbəri Andrey Serdyukov iştirak edəcəklər.
İclasda KTMT-nin məsuliyyət zonasındakı hərbi-siyasi vəziyyətlə bağlı fikir mübadiləsi aparılması və KTMT çərçivəsində əməkdaşlığın nəticələri ilə yanaşı, kollektiv təhlükəsizlik sisteminin gələcək inkişaf perspektivlərinin müzakirə edilməsi planlaşdırılır.
