Dekabrın 5-də Valettada keçirilən ATƏT Nazirlər Şurası çərçivəsində ER xarici işlər naziri Ararat Mirzoyan Nordik-Baltik (NB8) ölkələrinin xarici işlər nazirləri və nümayəndələri ilə görüşüb. Bu barədə ER XİN məlumat yayıb. İsveçin hazırkı sədrliyi dövründə ilk dəfə olaraq bu formatda birgə iclas keçirilib.
İclasda İsveçin xarici işlər naziri Mariya Stenerqaard, Finlandiyanın xarici işlər naziri Elina Valtonen, Latviyanın xarici işlər naziri Bayba Braje, Norveçin xarici işlər naziri Espen Bart Eyden və formatda iştirak edən digər ölkələrin nümayəndələri iştirak ediblər.
Görüşün nəticələrinə əsasən birgə press-reliz dərc olunub. “Şimali-Baltik ölkələri münasibətlərin möhkəmləndirilməsində qarşılıqlı maraqlı olduqlarını bir daha təsdiqlədilər və Ermənistanın Aİ və onun avropalı tərəfdaşları ilə əlaqələri dərinləşdirmək səylərinə güclü dəstəyini ifadə etdilər. Ermənistan Nordik-Baltik və Avropa icmalarının təməli olan demokratik dəyərləri və insan hüquqlarına hörməti bölüşür. Şimal-Baltik ölkələri Ermənistanın demokratik islahatlara sadiqliyini yüksək qiymətləndirir və Ermənistanın islahatlar səylərini dəstəkləməyə davam edəcək.
Aİ-də Nordik-Baltik ölkələri Avropa Şurasının Ermənistan-Aİ əlaqələrinin bütün istiqamətlərdə gücləndirilməsinə dair 2023-cü ilin oktyabrında qəbul etdiyi nəticələrə uyğun olaraq Ermənistan və Aİ arasında yeni və iddialı Tərəfdaşlıq Gündəliyinin qəbulunu gözləyirlər.
Nordik-Baltik ölkələri ATƏT-in hər üç təhlükəsizlik platformasında Ermənistanla əməkdaşlığı davam etdirmək öhdəliyini tanıyır. Nordik-Baltik ölkələri 1991-ci il Alma-Ata Bəyannaməsinə uyğun olaraq, suverenlik və ərazi bütövlüyünə qarşılıqlı hörmət əsasında Ermənistan və Azərbaycan arasında davamlı sülh sazişinin əldə edilməsi səylərini dəstəkləyir və təşəbbüsləri, o cümlədən regional əlaqələri və iqtisadi əməkdaşlığı inkişaf etdirmək məqsədi daşıyan “Sülh kəsişməsi” layihəsini alqışlayır”, – bəyanatda deyilir.
Nordik-Baltik (NB8) formatına İsveç, Finlandiya, İslandiya, Estoniya, Litva, Latviya, Danimarka və Norveç daxildir.
