Ermənistan-Azərbaycan münasibətləri o həddə çatıb ki, razılaşmanın bir neçə bəndi qalıb, lakin Azərbaycanın məqsədi Ermənistandan çoxlu güzəştlər götürməkdir. Bunu “Armenpress”ə müsahibəsində Ermənistan Respublikası Milli Elmlər Akademiyasının akademiki Ruben Safrastyan deyib.
Onun sözlərinə görə, Türkiyənin mövqeyi daha stratejidir, nə qədər tez o qədər yaxşıdır, çünki Türkiyənin Rusiyanın zəifləməsi ilə bölgədəki bu yeni vəziyyəti tez bir zamanda düzəltməsi çox vacibdir.
“Türkiyə indi elə bir siyasət aparır ki, onun məqsədi dünyada öz rolunu gücləndirməkdir. Onun üçün dar region o qədər də önəmli deyil. Azərbaycanın isə daha kiçik taktiki nöqteyi-nəzəri var, sadəcə olaraq Ermənistandan güzəştlər qoparmaq istəyir”, – Ruben Safrastyan bildirib.
Regionda baş verən dəyişikliklərlə bağlı İranın mövqeyinə gəlincə, Safrastyan qeyd edib ki, İranın narahatlığı ondan ibarətdir ki, Rusiyanın zəifləməsi ilə Qərbin və ya Türkiyənin mövqeyi güclənməsin.
“Bu mənada Ermənistan faktoru İran üçün çox önəmlidir və bu amil vasitəsilə o, Qərbin və Türkiyənin Cənubi Qafqazda mövqelərinin möhkəmlənməsinə mane olmaq istəyir. Təsadüfi deyil ki, İran Ermənistanın ərazi bütövlüyünün qorunub saxlanmasını qəti şəkildə dəstəkləyir”, – deyə Ruben Safrastyan bildirib.
