Ukrayna Prezidenti Vladimir Zelenskinin son bəyanatlarından biri Belarusla dövlətlərarası münasibətlərdə qızğın reaksiya və müzakirələrə səbəb olub.
Alman nüfuzlu Deutsche Welle tərəfindən sensasiyalı olaraq xarakterizə edilən bəyanatda Rusiya-Ukrayna müharibəsinin ilk günlərində Zelenski ilə Belarus Prezidenti Aleksandr Lukaşenko arasında telefon danışığına işarə edilir.
Ukrayna Prezidenti Vladimir Zelenski Rusiyanın Ukraynaya qarşı başlatdığı genişmiqyaslı müharibənin əvvəlində qonşu Belarus prezidenti Aleksandr Lukaşenkonun Belarus ərazisindən Ukraynaya raket zərbələri endirdiyinə görə ondan üzr istədiyini açıqlayıb. Ukrayna lideri bu barədə alim və bloqqer Leks Fridmanla geniş müsahibəsində danışıb.
Ukrayna prezidenti deyib:
“Müharibənin ilk günlərindən bir neçə gün sonra mən Lukaşenko ilə telefon danışığım oldu və o, üzr istədi. O deyib: “Mən deyiləm, mənim ərazimdən raketlər atılıb və bunu Putin edib”. Bu, onun sözləridir, şahidlərim var. Mənə dedi: “İnanın mənə, Vova, bu mən deyiləm. Mən buna nəzarət etmirəm, onlar sadəcə raketlərdir, Putindir…”
Ukrayna Prezidenti deyib ki, həmin söhbət zamanı Lukaşenko məsuliyyətdən uzaqlaşmağa çalışarkən, faktiki olaraq ölkəsinin ərazisindən Ukraynaya qarşı raket hücumları faktını etiraf edib.
Zelenskinin sözlərinə görə, Lukaşenko Belarus ərazisindən endirilən raket zərbələrinə nəzarət etmədiyini etiraf edib. Üstəlik, Zelenskinin sözlərinə görə, Lukaşenko cavab tədbiri olaraq Ukrayna ilə həmsərhəd Qomel vilayətində yerləşən Mozırda Belarusun ən böyük neft emalı zavodunu vurmağı təklif edib.
Bu sensasion bəyanat artıq kəskin reaksiya ilə üzləşib. Rəsmi Minsk bəyan edib ki, Belarusun Ukraynadan üzr istəməsi üçün heç bir əsas yoxdur.
Lukaşenkonun mətbuat katibi Natalya Eysmont Zelenskinin sözlərini qəti şəkildə təkzib edərək, Rusiyanın RBC agentliyinə verdiyi şərhdə Belarus liderinin Zelenskidən üzr istəmədiyini bildirib.
“Sadə bir səbəbdən üzr istəməyimiz üçün heç nə yoxdur. Hər şeydən əvvəl ona görə ki, Ukrayna, xatırladığımız kimi, hətta Amerika və bütün Qərbi qabaqlayaraq, Belarusa qarşı sanksiyaları ilk tətbiq edən ölkə olub”.
Belarus Prezidentinin mətbuat katibinin sözlərinə görə, Zelenski ilə Lukaşenko arasında söhbət doğrudan da baş tutub. Bununla belə, Natalya Eysmontun sözlərinə görə, rəsmi Minsk “danışıqlar masasında oturmağa çağırıb”.
Lukaşenkonun mətbuat katibi xatırladıb ki, bundan sonra Kiyev və Moskva arasında Belarusda üç raund danışıqlar keçirilib, daha sonra danışıqlar İstanbulda davam etdirilib.
Onlayn müzakirə hələ də davam edir. Ekspertlər vəd edilmiş dəlilləri gözləyirlər.
