Azərbaycan hakimiyyəti tərəfindən əsassız olaraq həbs edilmiş 23 erməniyə qarşı aparılan saxta məhkəmə prosesləri insan hüquqları standartlarının pozulması ilə müşayiət olunur.
Bütünlüklə ədalətli məhkəmə prinsipləri və təminatları tapdalanır. Bu barədə Ermənistanın xarici işlər naziri Ararat Mirzoyan BMT-nin İnsan Hüquqları Şurasının 58-ci sessiyasında çıxışı zamanı bildirib.
Ararat Mirzoyan iki günlük işgüzar səfərlə Cenevrədədir. Xarici işlər naziri həmçinin Silahsızlanma Konfransında iştirak edəcək və çıxış edəcək.
Bundan başqa, Ararat Mirzoyanın ikitərəfli görüşləri də planlaşdırılıb.
BMT-nin İnsan Hüquqları Şurası dünyada insan hüquqları problemlərinin müzakirəsi üçün simvolik bir gün seçib. Sessiyanın açılışı üç il əvvəl məhz bu gün başlayan Rusiya-Ukrayna müharibəsinin xatırladılması ilə başlayıb.
Bu münaqişə artıq dünyanın demək olar ki, bütün ölkələrinə və beynəlxalq sistemə təsir edib və etməyə davam edəcək.
“İnsan hüquqları insanlığın oksigenidir, lakin avtokratlar tərəfindən bir-bir boğulur”
BMT-nin Baş katibi Antonio Quterreş bildirib ki, insan hüquqları avtokratlar tərəfindən məhv edilir, hətta iqlim böhranı və mənəvi baxımdan iflasa uğramış qlobal maliyyə sistemi də insan hüquqlarını sıxışdırır.
Cenevrədəki işlərə Ermənistanın xarici işlər naziri Ararat Mirzoyan da qatılıb.
O, Ermənistanın insan hüquqlarının qorunması sahəsində atdığı addımlardan əlavə, Dağlıq Qarabağın etnik təmizlənməsi və Bakıda keçirilən məhkəmə prosesləri barədə də danışıb.
Ermənistanın Xarici işlər naziri beynəlxalq tribunanın qarşısında açıq şəkildə bəyan edib ki, “Azərbaycan hakimiyyəti tərəfindən əsassız olaraq həbs edilən 23 erməniyə qarşı aparılan saxta məhkəmə prosesləri insan hüquqları standartlarının pozulması ilə müşayiət olunur, bütünlüklə ədalətli məhkəmə prinsipləri və təminatları tapdalanır”.
Ararat Mirzoyan əlavə edib ki, Azərbaycan Ermənistanın ərazi bütövlüyünü sual altına alır. Bununla belə, İrəvan düşmənçilik səhifəsini çevirməyə və dayanıqlı sülhə doğru irəliləməyə hazırdır.
“Ermənistanın bu platformada iştirakı vacibdir”
Qloballaşma və Regional Əməkdaşlıq Mərkəzinin rəhbəri, politoloq Stepan Qriqoryan Ermənistanın bu platformada iştirakını vacib hesab edir. Onun sözlərinə görə, bu iştirak Ermənistanın mövqelərini çatdırmaq və sürətlə dəyişən geosiyasi proseslərdən xəbərdar olmaq üçün əhəmiyyətlidir.
“Biz diqqətlə izləməliyik. Ukrayna məsələsində istifadə edilən model, Cənubi Qafqazda da tətbiq oluna bilər. Bu isə bizi birbaşa maraqlandırır.
Əgər BMT-nin ‘oyun qaydaları’ daha da zəifləsə, bunun dünyaya təsiri necə olacaq? Əgər ümumi prinsiplər və yanaşmalar pozularsa, münaqişələr yalnız dinc yollarla həll olunmalıdır. BMT-nin “oyun qaydaları” dağılsa, ən çox zərər çəkən kiçik ölkələr olacaq”.
Silahsızlanma Konfransı
Cenevrədə Ermənistanın xarici işlər naziri iştirak edəcəyi digər mühüm tədbir Silahsızlanma Konfransıdır. Burada Ararat Mirzoyanın çıxışı planlaşdırılır.
Ermənistanın Xarici işlər naziri ötən il də eyni konfransda çıxış edib. 2024-cü ildə Ararat Mirzoyan bəyan etmişdi ki, Ermənistan müşahidəçi dövlət kimi qlobal səviyyədə silahsızlanma təşəbbüslərinin irəlilədilməsi üzrə müzakirələrə, məsləhətləşmələrə və təşəbbüslərə aktiv şəkildə qoşulmaq niyyətindədir.
O, həmçinin “Nüvə Silahlarının Yayılmaması haqqında” müqaviləyə Ermənistanın tam dəstək verdiyini bildirmişdi.
Ermənistanın xarici işlər naziri ötən il silahsızlanma konfransında münaqişələrin dağıdıcı təsirlərini görmüş ölkənin nümayəndəsi kimi çıxış edərək, yeni beynəlxalq tənzimləyici alətlərin və mexanizmlərin əhəmiyyətindən danışıb.
Bu, xüsusilə texnoloji irəliləyişlərin sürətləndiyi şəraitdə vacibdir.
2024-cü ilin konfransında Ararat Mirzoyan bəyan etmişdi ki, mövcud vəziyyət BMT-nin fundamental sənədlərinin və nizamnamə prinsiplərinin gözardı edilməsinin nəticəsidir.
O, güc tətbiqi və ya güc tətbiq etməklə hədələmənin yolverilməz olduğunu xüsusi vurğulamışdı. Belə bir laqeyd münasibət 2020-ci ilin 44 günlük müharibəsinə gətirib çıxardı.
“Ümumiyyətlə, Cənubi Qafqazda təhlükəsizlik vəziyyəti qeyri-sabit olaraq qalır, çünki Azərbaycan Ermənistan Respublikasına qarşı aqressiv siyasətindən əl çəkmir.
Bölgəmizdə sülh və təhlükəsizliyin təmin edilməsi üçün əvvəllər razılaşdırılmış prinsiplərdən geri çəkilərək, Azərbaycan Ermənistana qarşı yeni ərazi iddiaları irəli sürməkdə davam edir.
Bununla belə, Ermənistan hökuməti bölgəmizdə sülhün və sabitliyin təmin edilməsi, habelə Ermənistan və Azərbaycan arasında etimad və inamın bərqərar edilməsi üçün real səylərini davam etdirir.
Bu məqsədlə biz Ermənistan-Azərbaycan dövlət sərhədindən qoşunların eyni vaxtda geri çəkilməsini və sərhədyanı ərazilərin demilitarizasiyasını təklif etmişik.
Bundan əlavə, biz sülh müqaviləsindən əvvəl silahların nəzarətinə dair ikitərəfli mexanizmin və hücum etməmə haqqında müqavilənin imzalanmasını təklif edirik, əgər onun imzalanması üçün əlavə vaxt tələb olunarsa”.
Bu, ötən il Ermənistanın xarici işlər nazirinin Silahsızlanma Konfransında çıxışından bir hissə idi. Aydın görünür ki, bu günə qədər Mirzoyanın təsvir etdiyi vəziyyət dəyişməyib və Azərbaycan Ermənistanın təkliflərini qəbul etməkdən imtina etməyə davam edir.
Azərbaycan gözləmə mövqeyi tutur
Politoloq Stepan Qriqoryanın fikrincə, hazırkı qlobal geosiyasi proseslər fonunda Azərbaycan sadəcə gözləmə mövqeyi tutur.
“Onlar sülh müqaviləsini imzalamağa hazır deyillər. Bu, dəyişkən dünyada, ABŞ və Rusiyanın apardığı ciddi dəyişikliklər fonunda baş verir.
Qarışıqlıq var. Mənim fikrimcə, onlar bizi kapitulyasiyaya məcbur etmək üçün fürsət axtarırlar”.
Bu vəziyyət Ermənistana gələcək addımlarını düzgün hesablamağa imkan verə bilər.
İranla görüş
Ermənistanın Xarici işlər naziri Cenevrədə ikitərəfli görüşlər də keçirir. İlk görüşlərdən biri İran İslam Respublikasının Xarici işlər naziri Abbas Araqçi ilə olub.
Bu görüşdən yalnız qısa bir video yayımlanıb. Xarici işlər nazirləri hansı mövzuları müzakirə ediblər və görüş nə qədər davam edib, rəsmi olaraq açıqlanmayıb.
