“Sazişin yekunlaşması çox yaxşı xəbərdir. Fikrimizcə, bu sənəd nə qədər tez imzalansa, hər iki ölkə üçün, eləcə də bütün region üçün bir o qədər yaxşı olar. Biz regionda çoxlu qan, nifrət və müharibə gördük, buna son qoymağın vaxtıdır”. Bunu İranın xarici işlər nazirinin müavini Məcid Təxt Rəvançi İctimai Televiziyaya müsahibəsində Tehranın Ermənistan və Azərbaycan arasında “Sülh müqaviləsi”nin mətni ilə bağlı razılaşmanı necə qiymətləndirdiyi sualına cavab verərkən deyib.
“Biz hesab edirik ki, biz diqqəti təkcə Ermənistan və Azərbaycan üçün deyil, həm də bütün region üçün açacaq imkanlara yönəltməliyik. İran isə hər iki ölkənin dostu kimi Ermənistan və Azərbaycana dostluq əli uzatmağa hazırdır və biz Ermənistanla Azərbaycan arasında münasibətlərin yaxşılaşmasına töhfə vermək üçün əlimizdən gələni etməkdən çəkinməyəcəyik. Biz gələcəyə diqqət yetirməliyik. Keçmişdə iki ölkə arasında problemlər olub, ancaq hərbi yolla həlli ola bilməz; həmişə müvəqqəti həll yoludur. Keçmiş keçmişdə qalıb. İndi hər iki xalqın münasibətləri normallaşdırmaq üçün hansı imkanların olduğunu görmə vaxtıdır. Xüsusən də iqtisadi sahədə böyük potensial var, Ermənistanla Azərbaycan arasında “Sülh müqaviləsi”nin imzalanması halında bundan bütün region faydalanacaq”, – o bildirib.
Məcid Taxt Rəvançi Ermənistanın təqdim etdiyi “Sülhwn kəsişməsi” layihəsinə və onun regiona potensial təsirinə toxunaraq deyib:
“Hesab edirəm ki, qonşu ölkələr arasında əlaqə faktdır və buna hörmət edilməlidir. Qonşu ölkələr arasında nəqliyyat dəhlizləri, həmin ölkələri birləşdirən marşrutlar ticarət əlaqələrinin inkişafı baxımından mühüm əhəmiyyət kəsb edir. Biz qonşu ölkələr arasında əlaqələrin şaxələndirilməsinin tərəfdarıyıq ki, bu da insanların öz ölkələri arasındakı münasibətlərdən bəhrələnməsinin ən yaxşı yoludur. İran və Ermənistan qonşu kimi müxtəlif imkanlardan istifadə edə bilər. Məsələn, Ermənistan İranın avtomobil və dəmir yolu sistemindən istifadə etməklə İranın digər qonşularına çata bilər. Əksinə, İran Ermənistan vasitəsilə Ermənistanın qonşu dövlətləri ilə əlaqə saxlaya bilər, ona görə də qonşu ölkələr arasında ticarətin diversifikasiyası üçün kommunikasiyalar vacibdir.
İranın xarici işlər nazirinin müavini Ermənistanın da Aİ ilə əməkdaşlığı inkişaf etdirməsi faktını Tehranın necə qiymətləndirdiyini soruşduqda belə cavab verib: “Münasibətlərin inkişafının hər bir suveren ölkənin daxili işi olduğunu vurğulamaq istərdim. Bu, Ermənistanın Aİ ilə münasibətlərinə də aiddir. Biz qonşularımızın daxili qərarlarına qarışmırıq. Biz Ermənistan-Avropa İttifaqı münasibətlərinin inkişafını müsbət qiymətləndiririk. Bu kontekstdə Ermənistan-İran-Aİ üçtərəfli əməkdaşlığı üçün imkanlar yarana bilər ki, biz bunu alqışlayırıq. Biz regionu birlikdə inkişaf etdirə bilərik, bu barədə düşünə bilərik”.
O, Azərbaycanın İbrahim sazişlərinə mümkün qoşulması ilə bağlı son müzakirələrdən və Azərbaycanın İsrailin əsas neft tədarükçülərindən biri olmaqda davam etdiyindən danışaraq deyib: “İbrahim sazişi ilə bağlı mövqeyimiz aydındır: biz onun Yaxın Şərqdə sülh və təhlükəsizliyə töhfə verə biləcəyinə inanmırıq. Fələstin işğal edilməməlidir və bu, bölgəmizin ehtiyac duyduğu ən mühüm şeydir. İsrail diqqəti bölgədəki real problemlərdən yayındırmaq üçün hər fürsətdən istifadə edə bilər. Nə qədər ki, Fələstin işğal olunub, müqavimət davam edəcək, çünki xalq onların üzərində hökmranlıq və işğalı qəbul edə bilməz. İsraillilər beynəlxalq ictimaiyyətin və Yaxın Şərqin diqqətini Fələstin dövlətinin yaradılması zərurətindən yayındırmaq üçün müxtəlif üsullar üzərində düşünə bilərlər”.
