Aprelin 11-də Antalyada ADF 2025 Diplomatik Forumu işə başlayıb. CivilNet-dən Arşaluys Mğdesyan Türkiyənin Ermənistanla münasibətlərin normallaşdırılması üzrə xüsusi nümayəndəsi Serdar Kılıçdan Ermənistan-Türkiyə münasibətlərinin normallaşması və həmkarı Ruben Rubinyanla görüşü barədə eksklüziv müsahibə verib.
SUAL: – Cənab Kılıç, bu fürsət üçün təşəkkür edirik. Zəhmət olmasa, bu gün Ermənistanlı həmkarınızla görüşünüz haqqında nə deyə bilərsiniz? Ermənistan-Türkiyə prosesi və danışıqları barədə nə düşünürsünüz?
CAVAB: – Bu danışıq deyil, hətta normallaşma prosesi də deyil. Şəxsi fikrimi soruşsanız, bu iki ölkə arasında etimadın bərpası prosesidir.
İndiyə qədər vacib addımlar atdıq. Yaxınlarda tarixi “Ani” körpüsünün bərpasına qərar verdik. İşçi qruplarımız münasibətlərin bərpası prosesinin texniki tədqiqatına başlayıb.
Tezliklə sınaq işlərinə başlayacağıq. Prosesi sürətləndirmək üçün hər şeyi edirik, çünki bu hər iki ölkə və xalq üçün faydalıdır. Rubenlə yaxşı anlaşırıq. Bir-birimizi başa düşürük və prosesi irəli aparmaq üçün əlimizdən gələni edirik.
SUAL: – Üçüncü ölkə vətəndaşları üçün Ermənistan-Türkiyə sərhədinin nə vaxt açılacağı barədə nə deyə bilərsiniz?
CAVAB: – Bu mövzuda 2022-ci ildə qərar qəbul etmişdik: üçüncü ölkə vətəndaşları və diplomatik pasportu olanlar üçün. Hal-hazırda texniki detallar üzərində işləyirik.
Bunun nə vaxt baş verəcəyini bilmirəm, amma ciddi çalışırıq. Ümid edirəm ki, mümkün qədər tezliklə bu prosesi başa çatdıracağıq.
SUAL: – Son sual. Bu gün Ermənistan Konstitusiyası ilə bağlı şərh etdiniz. Bunu dəqiqləşdirə bilərsinizmi?
CAVAB: – Bu vacib sualdır. Qeyd etdiyiniz kimi, Azərbaycan Ermənistan Konstitusiyasının dəyişdirilməsini tələb edir.
Ermənistan hökuməti artıq Konstitusiyada dəyişiklik etmək istədiyini bildirib. Lakin bu, Ermənistanın daxili işidir.
Erməni xalqı və Ermənistanın dövlət qurumları bu dəyişikliyin necə və nə vaxt həyata keçiriləcəyini müəyyən edəcək.
