Ermənistanda demokratik inqilab baş verəndə və indiki hakim partiyamız hakimiyyətə gələndə biz demək olar ki, dərhal Konstitusiyamıza dəyişikliklər edəcəyimizi bəyan etdik. İndi isə, mənim gördüyüm kimi, bu, təkcə mövcud Konstitusiyaya düzəliş deyil, həm də yeni Konstitusiya olacaq. Bunu Türkiyə mətbuatına müsahibəsində Ermənistanın xarici işlər naziri Ararat Mirzoyan Ermənistanın Azərbaycanla sülh sazişi imzalamaq üçün konstitusiya dəyişikliyinə baxıb-baxmayacağı sualına münasibət bildirərkən deyib.
“Konstitusiya dəyişiklikləri ilə məşğul olan mövcud komitə hüquqi mexanizmləri müzakirə edir və bildiyimə görə, komitənin mandatı 2026-cı ildə başa çatır. Həmin ildə parlament seçkilərimiz var. Belə ki, 2018-ci ildən biz yeni Konstitusiyaya ehtiyacın olmasında israrlı idik və bu, gündəmimizdə qalmaqda davam edir. Biz bunu reallaşdırmağa gedirik.
Amma məsələni Ermənistan-Azərbaycan münasibətlərinin normallaşması ilə əlaqələndirmək konstruktiv deyil. Əvvəlki şərhlərimə qayıdaraq vurğulamaq istəyirəm ki, bunun iki yolu var. Birincisi, bütün mümkün suallara cavab verilənə qədər gözləmək və yalnız bundan sonra hərəkətə keçməkdir. İkincisi, bütün həlləri bir anda gözləmədən indi hərəkətə keçmək.
Mən də panel müzakirəsi zamanı bu barədə danışdım, vurğuladım ki, mərhələ-mərhələ tikmək lazımdır, əvvəlcə birinci daşı, sonra növbətini və s. Əminəm ki, nə vaxtsa geriyə baxanda görəcəyik ki, biz güclü və sabit körpü tikmişik. Ona görə də biz dərindən əminik ki, indidən başlamalıyıq.
Jurnalistin xahişi ilə Aİ-nin monitorinq missiyasının sualına cavab verən Mirzoyan qeyd edib ki, missiyanın mandatı əsasən Ermənistan və Azərbaycan arasında münasibətlərin normallaşdırılması prosesinin dəstəklənməsinə, eləcə də sərhəddə sabitliyin təmin olunmasına yönəlib. Və sülh müqaviləsi imzalanan və qüvvəyə minən kimi artıq belə bir missiyaya ehtiyac qalmayacaq.
“Sərhəddə sabitlik bərqərar olduqdan sonra, bu o deməkdir ki, mandat, missiya tamamlanıb və əlavə müdaxiləyə ehtiyac qalmayacaq. Bununla belə, ümumilikdə əsas problemin Sizin sualınızda olduğunu düşünürəm. Nə Konstitusiya, nə Minsk qrupu, nə də başqa bir şey. Problem ondadır ki, bəzən bizdə belə bir fikir yaranır ki, Azərbaycan Ermənistanla sadəcə olaraq sülh qurmaq istəmir. Hansı hesablamalara əsaslanaraq deyə bilmərəm, lakin həqiqətən narahatlıqlarımız var ki, onlar nizamlanmanı başa çatdırmaq istəmirlər, danışıqları başa çatdırmaq və sülh sazişini imzalamaq istəmirlər”, – Mirzoyan qeyd edib.
O, nizamlanma prosesində başqa istiqamətlərin də olduğunu vurğulayıb. “Biz kommunikasiyanın bərpasına, qarşılıqlı etimadın möhkəmləndirilməsinə, o cümlədən qarşılıqlı yoxlama və silahlara nəzarətə yönəlmiş bir sıra təkliflər təqdim etmişik. Bunlar əsaslı və real təkliflər idi. Lakin təəssüf ki, heç bir konstruktiv rəy almamışıq.
Ümumi təəssürat ondan ibarətdir ki, Azərbaycan tərəfi sadəcə olaraq nizamlanma prosesini başa çatdırmaqda maraqlı deyil və faktiki olaraq sülhün qurulmasına həvəsli deyil. Üstəlik, biz vaxtaşırı həm Azərbaycan rəhbərliyinin ritorikasında, həm də vəziyyətin faktiki inkişafında gərginliyin yeni təzahürlərinin şahidi oluruq ki, bu da təəssüf ki, gərginliyə səbəb ola bilər.
Məsələn, Ermənistan ictimai rəyinə nəzər salsanız, görərsiniz ki, Ermənistan vətəndaşlarının əhəmiyyətli bir hissəsi Azərbaycanın bundan sonra da planları olduğuna inanır: Ermənistana yeni hücuma keçmək, onun suveren ərazilərinin müəyyən hissələrinə nəzarəti bərqərar etmək və s.. Bu mənada demək olar ki, sualınıza da cavab var. Biz Azərbaycanın real niyyətlərini öyrəndikdə, çox güman ki, suallara cavab tapa biləcəyik”, – ER XİN rəhbəri bildirib.
O qeyd edib ki, növbəti görüşlər, sülh sazişinin harada və necə imzalanacağı ilə bağlı heç bir xəbər yoxdur. “Mövqelərini deyirlər ki, bu və ya digər tələblər yerinə yetirilməyənə qədər bu məsələni müzakirə etməyəcəklər, əvvəl birinci, sonra ikinci, sonra üçüncü və s. Reallıq budur, lakin biz onlarla ünsiyyətimizi davam etdiririk”, – deyə Ararat Mirzoyan bildirib.
