Nordic Monitor: “Avropa Parlamenti özünün Türkiyəyə aid sərt hesabatında onun DQ münaqişəsində təcavüzkar rolunu qeyd edib”
Avropa Parlamentinin yeni hesabatı Türkiyə prezidenti Rəcəb Tayyib Ərdoğanın dövründə həyata keçirilən xarici siyasəti kəskin şəkildə tənqid edir.
Bu siyasət getdikcə daha münaqişəli xarakter alaraq, AB-nin dəyərləri ilə uyğunsuzluq təşkil edir və uzun müddətdir davam edən üzvlük prosesinə zərər vurur.
Bu barədə İsveç nəşri olan Nordic Monitor məlumat yayıb.
Avropa Parlamentinin Türkiyə üzrə hesabatçısı Naxo Sançes Amor tərəfindən hazırlanan hesabatda son iki il ərzində AB və Türkiyə arasındakı münasibətlərin vəziyyəti qiymətləndirilib.
Ankaranın beynəlxalq mövqeyi kəskin şəkildə tənqid olunaraq, onun xarici siyasətinin tez-tez AB-nin prioritetlərinə zidd olduğu və Türkiyənin hərəkətlərinin ittifaqla əməkdaşlığı təşviq etmək əvəzinə gərginlik yaratdığı vurğulanıb.
Hesabatda Türkiyənin beynəlxalq fəaliyyətinin geniş spektri – qonşu regionlarda hərbi əməliyyatlardan tutmuş artan strateji müstəqilliyinə qədər – ətraflı təhlil edilir.
Bunlar Ankaranın AB-nin siyasi standartları və prinsiplərindən uzaqlaşmasının əlaməti kimi qiymətləndirilir.
Hesabat narahat edici bir paradoks əsasında qurulub: Türkiyə AB üzvlüyünə namizəd ölkə olaraq qalır, lakin özünü getdikcə daha çox geosiyasi rəqib kimi aparır.
Hesabata görə, Türkiyə xarici siyasətini əsasən AB-nin xarici və təhlükəsizlik siyasəti ilə uyğunlaşdırmır və Ankaranın bəyanatları ilə qərarlarının uyğunluq səviyyəsi son illərdə davamlı şəkildə aşağı qalıb.
Xüsusilə, 2023-cü ildə Türkiyə AB-nin xarici siyasət mövqelərinin yalnız kiçik bir hissəsinə sadiq qalıb. Parlament Ukraynaya Rusiyanın işğalından sonra Ankaranın AB-nin Rusiyaya qarşı sanksiyalarını tətbiq etməməsindən dərin narahatlıq bildirib.
Bu qərar Türkiyəni Kremlin təcavüzünə qarşı ittifaqın vahid mövqeyinə birbaşa zidd edir. Bundan əlavə, hesabatda Suriyada və İraqda Türkiyənin davamlı hərbi mövcudluğu, kürd qrupları ilə davam edən toqquşmalar və Liviya və Dağlıq Qarabağ kimi münaqişələrdə Ankaranın təcavüzkar rolu ilə bağlı narahatlıqlar qeyd olunub.
Avropa Parlamentinin üzvləri qənaətə gəlib ki, bu hərəkətlər regional sabitliyi pozur və AB-nin diplomatik səylərinə ziddir. Sənəddə həmçinin NATO və AB üzvü olan Yunanıstanla, eləcə də Kiprlə Türkiyə arasındakı gərgin münasibətlər əks olunub.
AB qanunvericiləri üçün xüsusilə narahatlıq doğuran amillər Yunanıstanın ərazisi üzərində davam edən uçuşlar və Şərqi Aralıq dənizinin mübahisəli sularında hərbi-dəniz təlimləridir.
Hesabatda Türkiyəyə beynəlxalq hüquqa hörmət etmək çağırışı edilir və Yunanıstanın hava sərhədinin dəfələrlə pozulması pislənilir.
