Ermənistan Respublikasının Maliyyə naziri Vahe Hovhannisyan Asiya İnkişaf Bankının Milanda keçirilən 58-ci İllik Toplantısı çərçivəsində AİB-in yeni təyin olunmuş Prezidenti Masato Kanda ilə ikitərəfli əməkdaşlığın yeni yollarını və iqtisadi inkişafa yönəlmiş maliyyə proqramlarını müzakirə etmək üçün görüşüb.
Bu barədə Ermənistanın Maliyyə nazirliyi məlumat yayıb.
Görüş zamanı tərəflər Ermənistan Respublikasının və regionun investisiya imkanlarını və iqtisadi artımın təşviqinə yönəlmiş islahatları müzakirə ediblər.
Nazir Hovhannisyan Ermənistan iqtisadiyyatının davamlı inkişafının təmin edilməsi kontekstində AİB ilə əməkdaşlığın vacibliyini vurğulayıb.
AİB Prezidenti Masato Kanda Ermənistan Respublikası hökumətinin maliyyə idarəçiliyi və investisiya mühitinin yaxşılaşdırılmasına yönəlmiş səylərini yüksək qiymətləndirib, həmçinin AİB-in gələcəkdə Ermənistanın inkişaf prioritetlərinə dəstəyini davam etdirməyə hazır olduğunu təsdiqləyib.
Bu görüş Ermənistan Respublikası Hökuməti ilə Asiya İnkişaf Bankı arasında davamlı və səmərəli əməkdaşlığın gücləndirilməsi prosesində mühüm addımdır.
