İran Cənubi Qafqazda kommunikasiyaların blokdan götürülməsi tərəfdarıdır, lakin onun Ermənistan Respublikasının suverenliyi altında olmasının vacibliyini vurğulayır.
“Armenpress”in məlumatına görə, bunu İran İslam Respublikasının Ermənistandakı səfiri Mehdi Sobhani jurnalistlərlə söhbətində deyib.
“Biz sülhü dəstəkləyirik. Biz Ermənistan və Azərbaycan arasında aparılan sülh danışıqlarını dəstəkləmişik və bundan sonra da dəstəkləyəcəyik. İnanırıq ki, sülh sazişinin imzalanması hər iki ölkənin və regionun maraqlarına uyğundur. Və biz həmin sazişin imzalanmasına töhfə verməyə hazırıq”, – səfir bildirib.
O xatırladıb ki, İran Ermənistanın baş nazirinin təklif etdiyi “Sülhün kəsişməsi” layihəsini alqışlayır. “Bu, regionda blokadanın aradan qaldırılması üçün bir fürsət ola bilər, biz blokadanın qaldırılmasının əleyhinə deyilik, siz bizim mövqeyimizi bilirsiniz.
“Lakin blokadanın istənilən qaldırılması Ermənistan Respublikasının suverenliyi altında olmalıdır. Və hesab edirəm ki, bu layihə regionda yüklərin daşınmasına töhfə verəcək”, – o bildirib.
