Rusiyanın xarici işlər naziri Sergey Lavrov Ermənistanın təşəbbüsü ilə həyata keçirilən “Sülhün kəsişməsi” layihəsinə toxunaraq, onun həyata keçirilməsinin Yerevanla Bakı arasında sülh sazişinin imzalanması, eləcə də Yerevanla Ankara arasında münasibətlərin normallaşması halında mümkün olacağını bildirib.
“Armenpress”in məlumatına görə, bu barədə Sergey Lavrov tarixi cənub Rusiya torpaqlarına həsr olunmuş yüksək səviyyəli konfransda çıxış edərək, Cənubi Qafqazda və digər regionlarda kommunikasiya yollarının və infrastrukturun mümkün blokdan çıxarılmasına, o cümlədən Ermənistanın təqdim etdiyi “Sülhün kəsişməsi” təşəbbüsünün perspektivlərinə toxunub. Rusiya xarici işlər naziri qeyd edib ki, erməni tərəfi bir neçə gün əvvəl Yerevana səfəri zamanı bu təşəbbüsün təfərrüatlarını ona təqdim edib.
“Ermənistan tərəfi öz ərazisini və logistik imkanlarını əsas kontinental proseslərə daxil etməyə çalışaraq “Sülhün kəsişməsi” adlı təşəbbüs hazırlayır. Əgər bu barədə danışsaq, o zaman biz bütün infrastruktur layihələrinin inkişafının tərəfdarıyıq”, – Lavrov qeyd edib. O əlavə edib ki, bu təşəbbüsün praktikada həyata keçirilməsi üçün Ermənistanla Azərbaycan arasında sülh sazişinin imzalanması zəruridir.
“Onlara bu işdə səmimi qəlbdən uğurlar arzulayırıq. Aydındır ki, razılaşma Rusiya Federasiyası, Ermənistan və Azərbaycan arasında bir neçə üçtərəfli sammitlər nəticəsində əldə olunub. Hər iki tərəf maraqlı olarsa, biz gələcəkdə də bunu dəstəkləməyə hazırıq”, – Sergey Lavrov vurğulayıb.
Rusiya xarici işlər naziri çıxışında Ermənistanla Türkiyə arasında münasibətlərin normallaşması prosesinə də toxunaraq qeyd edib ki, münaqişələrin aradan qaldırılması və münaqişələr səbəbindən bağlanmış nəqliyyat və iqtisadi əlaqələrin blokunun açılması mütləq regionun rəqabət qabiliyyətinin yüksəldilməsinə kömək edəcək.
