“Yerevan Dialoqu” İkinci Beynəlxalq Forumu çərçivəsində ER xarici işlər naziri Ararat Mirzoyanın iştirakı ilə “Yaxın Şərq, Cənubi Qafqaz və Mərkəzi Asiyada təhlükəsizlik çağırışlarının inklüziv əməkdaşlıq vasitəsilə idarə edilməsi” adlı panel müzakirəsi keçirilib. Bu barədə Ermənistan Xarici İşlər Nazirliyi məlumat yayıb.
Panel müzakirəsində Fransanın xarici işlər naziri Jan-Noel Barron, Fələstinin xarici işlər və miqrasiya üzrə dövlət naziri Varsen Ağabekyan, Birləşmiş Millətlər Təşkilatının Avropa İqtisadi Komissiyasının icraçı katibi Tatyana Molçani və Türkiyənin “Beynəlxalq Böhran Qrupu” təşkilatının proqram meneceri Nigar Göksel də iştirak ediblər.
“Biz artıq sülhün bərqərar olması istiqamətində nəzərəçarpacaq addımlar atmışıq. Həmin addım isə Ermənistan və Azərbaycan arasında sülh müqaviləsi layihəsinin mətni üzrə ikitərəfli razılaşmadır. Səmimi qəlbdən ümid edirəm ki, hamı bunun mühüm nailiyyət olduğunu dərk edəcək və biz bu sazişi imzalamağa, onu ratifikasiya etməyə hazırıq və təbii ki, bu, Cənubi Qafqazda yeni sülh və əməkdaşlıq erası açacaq. Həm də bu panelin başlığına istinad edərək, mümkündür və ümid edirəm ki, bu model digər regionlar üçün də həqiqətən tətbiq oluna bilər. Təbii ki, hər bir münaqişənin özünəməxsus xüsusiyyətləri və nüansları var, lakin sülhün bərqərar olmasına, açıq əməkdaşlıq və sülh dövrünün formalaşmasına bu ümumi yanaşma Ukrayna, Yaxın Şərq və kənar müdaxiləyə və ya dəstəyə ehtiyacı olan digər regionlara da keçə bilər. (…) Əməkdaşlıq və sülh ərazi bütövlüyünün qarşılıqlı və aydın şəkildə tanınmasına əsaslanmalıdır. Sərhədlər pozulursa, bütün konsepsiya dağılır. Ona görə də biz təkcə Sülh Müqaviləsini müzakirə edə bilmirik, bu, yenə də kifayət qədər sadə sənəddir, heç bir sülh müqaviləsi iki ölkə arasında həyatın bütün aspektlərini və ya münasibətlərini tənzimləyə bilməz, ona görə də biz həm Azərbaycanın, həm də Ermənistanın ərazisindən keçən mümkün gələcək əməkdaşlıq və tranzit yollarını müzakirə edirik. Buna görə də əməkdaşlıq və iştirak həqiqətən də əsas rolu daşıyır”, – deyə Ararat Mirzoyan bildirib.
