ER Xarici işlər naziri Ararat Mirzoyan hesab edir ki, Ermənistan və Azərbaycan arasında mümkün sülh sazişi Ermənistan və Türkiyə arasında münasibətlərin normallaşdırılması üçün bir imkan ola bilər.
Ermənistanın Xarici işlər naziri eyni zamanda belə bir fikir bildirib ki, Ermənistan və Türkiyə arasında münasibətlərin qurulması istiqamətində irəliləyişin özü də Ermənistan və Azərbaycan arasında tənzimləmə prosesinə böyük təsir göstərə bilər.
Alınan məlumata görə, “Yerevan Dialoqu” konfransı çərçivəsində keçirilən panel müzakirəsi zamanı moderator Ermənistanın Xarici işlər nazirinə sual verib:
Görəsən, Ermənistan və Azərbaycan arasında mümkün sülh sazişi Ermənistan və Türkiyə arasında münasibətlərin normallaşması üçün imkan yarada bilərmi?
“Qısa cavab versəm, bəli. Biz Türkiyə ilə dialoqa başlamışıq – hər iki tərəf bu prosesin heç bir ilkin şərt olmadan baş tutmalı olduğunu nəzərə alaraq və açıq şəkildə bildirmişlər.
Və indi demək istəyirəm ki, biz məmnuniyyətlə görürük ki, Ermənistan və Türkiyə arasındakı dialoq elə də problemli deyil, necə ki, ola biləcəyi təxmin edilirdi.
İndi biz elə bir nöqtəyə çatmışıq ki, Ermənistan və Türkiyə arasında diplomatik münasibətlərin qurulmasına və sərhədlərin nəhayət açılmasına, həmçinin əlaqələndirmə məsələlərinin həll olunmasına mane olan yeganə məsələ Ermənistan və Azərbaycan arasında dialoq və danışıqların tam yekunlaşmamış statusudur.
Mənim şəxsi fikrimcə, əgər biz Türkiyə ilə münasibətlərdə irəliləyiş əldə etsək, bu irəliləyiş Ermənistan və Azərbaycan arasında münasibətlərin tənzimlənməsi üçün böyük müsbət təsir göstərəcək” – deyə Mirzoyan bildirib.
