Müqəddəs Eçmiədzinin Ana taxt-tacının təşəbbüsü və Bütün Ermənilərin Katolikosunun təklifi ilə Ümumdünya Kilsələr Şurası İsveçrədə “Dini etiqad azadlığı: Artsaxda erməni mənəvi, mədəni və tarixi irsinin qorunması” adlı beynəlxalq konfrans təşkil etmişdir.
“Armenpress”in məlumatına görə, konfransın açılışında Bütün Ermənilərin Katolikosu II Qaregin Azərbaycanın hərəkətlərini sərt şəkildə tənqid edib. O bildirib ki, Türkiyənin hərbi dəstəyi ilə Azərbaycan Artsaxı nəinki tamamilə boşaldıb, həm də sülh müqaviləsi prosesində yeni tələblər irəli sürməyə davam edir.
Katolikos beynəlxalq ictimaiyyətin diqqətini Azərbaycanın Dağlıq Qarabağın keçmiş siyasi liderlərini, mülki şəxsləri və hərbi əsirləri girov saxlamasına, onlara qarşı beynəlxalq hüququn kobud şəkildə pozulması ilə müşayiət olunan qondarma, şou məhkəmələri aparmasına yönəldib. O, həmçinin vurğulayıb ki, bütün bu hərəkətlər millətçilik və erməni xalqının mənəvi-mədəni irsini məhv etmək məqsədi daşıyan anti-erməni siyasəti ilə şərtlənir. Onun sözlərinə görə, Dağlıq Qarabağın qədim kilsə və monastırları alban elan edilir, onların əsl kimliyi təhrif edilir, çoxsaylı müqəddəs yerlər, yaşayış məntəqələri, qəbiristanlıqlar vəhşicəsinə dağıdılır. Katolikos öz çıxışında xatırladıb ki, Artsax erməniləri əsrlər boyu öz vətənlərində bəşəriyyətin irsini zənginləşdirərək yüksək qiymətli mədəniyyət yaradıblar.
O vurğulayıb ki, bu gün Dağlıq Qarabağın mənəvi-mədəni irsinin qorunub saxlanması həmişəkindən daha aktualdır. Ümumdünya Kilsələr Şurasının baş katibi konfransda vurğuladı ki, xristianlar həqiqətin şahidi olmağa, qurbanların yanında dayanmağa və şərə qarşı çıxış etməyə çağırılır. Konfransın məqsədi Dağlıq Qarabağda dini və mədəni irsin qorunub saxlanmasının zəruriliyi ilə bağlı beynəlxalq məlumatlılığın artırılmasıdır.
