Baş nazir Nikol Paşinyan Tavuş bölgəsində ordu oyunları çərçivəsində keçirilən döyüş estafeti yarışlarında iştirak edib. Ordu oyunları ardıcıl üçüncü ildir keçirilir və bu il iyunun 29-dan başlayaraq iyulun 6-da başa çatacaq.
Yarışlarda Ermənistan Respublikasının Müdafiə, Daxili İşlər, Ədliyyə nazirlikləri, Milli Təhlükəsizlik Xidməti, Dövlət Gəlirləri Komitəsi, İstintaq, Korrupsiyaya Qarşı Mübarizə Komitələri, Prokurorluq və Dövlət Mühafizə Xidmətinin yığma komandaları iştirak edir.
Bu komandaların tərkibində qadın əməkdaşlar da yer alır. Ümumilikdə oyunlarda 19 komanda iştirak edir.
Baş nazir yarış iştirakçılarına ordu oyunlarında iştirak etdiklərinə görə təşəkkür edib və uğur qazanan hər kəsi təbrik edib.
“Ordu oyunlarının keçirilməsi ilə biz xidmətçilər üçün əlavə stimul yaratmaq, onların işlərinə daha çox diqqət yetirmələrini və peşəkar səviyyələrini daim artırmağa daha böyük motivasiyaya sahib olmalarını istəyirik” – deyə Nikol Paşinyan bildirib.
Yarışlar “Yönləndirmə” növü üzrə keçirilir. Hakimlər iştirakçıların hərəkətlərini izləyib, onların sürətini və dəqiqliyini qiymətləndiriblər.
Ordu oyunları çərçivəsində müxtəlif silahlardan atıcılıq, dördnövçülük, hərbi kross və estafet yarışları da keçirilib.
Hərbi dördnövçülük, hərbi kross, yönləndirmə, “AK 103” avtomatından atıcılıq, “PM” tapançasından atıcılıq növləri üzrə ümumi hesabda 1-ci, 2-ci və 3-cü yerləri tutan iştirakçılar (kişilər və qadınlar) müvafiq dərəcəli sertifikatlar, medallar və pul mükafatı ilə təltif olunacaqlar:
1-ci yer – 1 000 000 dram, 2-ci yer – 500 000 dram, 3-cü yer – 300 000 dram, 1-ci yeri tutan komanda isə kubokla təltif olunacaq.
Hərbi kross estafet yarışının qalib komandasının üzvləri medallar, fəxri fərmanlar və pul mükafatı ilə təltif olunacaqlar: 1-ci yer – 300 000 dram, 2-ci yer – 200 000 dram, 3-cü yer – 150 000 dram.
Komanda hesabında mükafat yerlərini tutan komandalar müvafiq dərəcəli sertifikatlar və kubokla təltif olunacaqlar. ( 1 dollar 387 dram təşkil edir).
