Ermənistan və Yaponiya atmosfer havasının keyfiyyətinin monitorinqi sisteminin modernləşdirilməsi üçün əməkdaşlıq edəcəklər. Bu barədə Ermənistanın Ətraf Mühit nazirliyi məlumat yayıb.
İyulun 10-da ER hökuməti sektorun davamlı texnoloji inkişafına imkan verəcək qrant sazişinin imzalanmasını təsdiqləyib.
Havanın keyfiyyətinin monitorinqi həm insan sağlamlığının qorunması, həm də iqlim dəyişikliyi ilə mübarizə üçün mühüm vasitədir. Lakin hazırda istifadə olunan metodlar köhnəlib və müasir tələblərə cavab vermir.
Məsələn, əldə edilmiş məlumatlar ən azı üç gündən sonra əlçatan olur və mühüm çirkləndiricilərin – PM10, PM2.5 və dəm qazının ölçülməsi texniki cəhətdən mümkün deyil.
Layihə sayəsində havanın çirklənməsinin real vaxt rejimində mənzərəsini yaradacaq üç müşahidə stansiyasının müasir Yaponiya avtomatik avadanlıqları ilə təchiz edilməsi planlaşdırılır.
Məlumatlar həm də ictimaiyyətə açıq olacaq və onlara havanın keyfiyyətini onlayn izləməyə imkan verəcək.
Bu əməkdaşlıq Ermənistanda atmosfer havasının monitorinqinin beynəlxalq standartlara uyğunlaşdırılmasına töhfə verəcək və ətraf mühitə nəzarət imkanlarını gücləndirəcək.
