Altay Respublikasında keçirilən Beynəlxalq Ətraf Mühit Konfransında Ermənistanın baş naziri Nikol Paşinyan MDB ölkələrinin hökumət başçılarını BMT-nin Biomüxtəliflik COP17 üzrə Beynəlxalq İqlim Konfransında iştirak etməyə dəvət edib. Tədbir 2026-cı ildə Yerevanda keçiriləcək.
“Tərəflərin Biomüxtəliflik üzrə 17-ci Konfransı (COP17) 2026-cı ilin oktyabrında Ermənistanda keçiriləcək. Biz COP17-nin işində ölkələrinizin yüksək səviyyəli nümayəndə heyətlərinin, eləcə də akademik və ekspert dairələrinin nümayəndələrinin iştirakına ümid edirik”, – Paşinyan bildirib.
Baş nazir vurğulayıb ki, Ermənistan məhsuldar dialoqun təşkili, tərəflərin mövqelərinin yaxınlaşması və bütün tərəflərin maraqlarını və prioritetlərini nəzərə alan balanslaşdırılmış və mənalı qərarlar qəbul etmək üçün hər cür səy göstərəcək. “Əminik ki, biz birlikdə planetimiz üçün ortaq məsuliyyət ruhunda biomüxtəlifliyin qorunması və təbii ehtiyatlardan rasional istifadə üzrə qlobal səylərə mühüm töhfə verə biləcəyik”, – Paşinyan qeyd edib.
O, əlavə edib ki, Ermənistan da Qırğızıstanın təşəbbüsü ilə BMT çərçivəsində Dağlı Ölkələr Qrupunun işində fəal iştirak edir. “Ümid edirik ki, qrup iqlim konfransı çərçivəsində danışıqlar proseslərinin fəal iştirakçısına çevriləcək, bu məqsədlə biz lazımi gündəliyin formalaşmasına fəal töhfə verməyə hazırıq”, – Ermənistanın baş naziri izah edib.
