ER Baş naziri Nikol Paşinyan və Amerika Birləşmiş Ştatlarının Prezidenti Donald Trampın Vaşinqtonda keçirilən ikitərəfli görüşünün nəticəsi olaraq Ermənistan və ABŞ arasında imzalanan üç Memorandum qarşıdakı illərdə ikitərəfli əlaqələrin əsas istiqamətlərini müəyyən edir.
Alınan məlumata görə, bu barədə ABŞ-dakı Ermənistan səfiri Lilit Makunts bildirib.
“Ermənistanın Baş naziri Nikol Paşinyan və Amerika Birləşmiş Ştatlarının Prezidenti Donald Tramp arasında imzalanan üç memorandum olduqca əhəmiyyətlidir.
Qeyd etmək istəyirəm ki, bunlar “Sülh kəsişməsi” layihəsinin çərçivəsində qabiliyyətlərin inkişafına, süni intellekt və yarımkeçiricilər sahəsində innovasiyaların inkişafına, eləcə də enerji təhlükəsizliyi sahəsində əməkdaşlığa aiddir.
Bu üç memorandum qarşıdakı illərdə ikitərəfli əlaqələrin əsas istiqamətlərini müəyyən edir və bu istiqamətlər üzərində işləmək vacibdir. Hərbi baxımdan belə planlaşdırmanın olması çox önəmlidir” – deyə Makunts bildirib.
Səfir xatırladıb ki, bu ilin yanvarında Ermənistan və ABŞ arasında strateji tərəfdaşlıq haqqında sənəd imzalanmışdı və orada əməkdaşlığın geniş sahələri müəyyən olunmuşdu.
“Və o zaman biz ABŞ-ın yeni formalaşan administrasiyası ilə müzakirə edib bu mərhələ üçün üstünlük veriləcək sahələri anlamağı planlaşdırırdıq və bu istiqamətlər kifayət qədər vacib sayıldı” – deyə o, əlavə edib.
Onun sözlərinə görə, ikitərəfli əlaqələrin belə yüksək səviyyəsi yalnız Ermənistan-ABŞ strateji tərəfdaşlığı baxımından deyil, həm də bölgəmizdə və AB üzv dövlətlərində Ermənistanın rolunun və çəkisinin artırılmasına xidmət edəcək.
