Oktyabrın 6-da Londondakı Britaniya Kitabxanasında “Britanahay” (“Britaniya erməniləri”) adlı sərginin açılışı olub. Alınan məlumata görə, bu barədə Ermənistanın Birləşmiş Krallıqdakı səfirliyi məlumat yayıb.
Kitabxananın “Xəzinələr” qalereyasında təqdim olunan sərgi ermənilər və britaniyalılar arasında əsrlər boyu formalaşmış münasibətlərə həsr olunub .
Britaniya imperiyası dövründəki tarixi əlaqələrdən tutmuş müasir Böyük Britaniyanın fəal erməni icmasına və erməni mədəniyyətinə dərin hörmət bəsləmiş çoxsaylı britaniyalılara qədər.
Sərgidə bir sıra maraqlı eksponatlar təqdim olunur — o cümlədən 1736-cı ildə Londonda çap olunmuş ilk ermənidilli kitab, Movses Xorenatsinin “Ermənilərin tarixi”, eləcə də Ermənistan və İngiltərə hökmdarlarının ilk görüşünə həsr olunmuş XV əsrə aid gözəl fransız əlyazması, burada Kilikiyanın V Levon kralının London şəhərində II Riçardla görüşü təsvir olunur.
Bundan əlavə, XX əsr britan-erməni fotoqraf İda Karrın işlərini təqdim edən nəşr də nümayiş etdirilir.
Sərgi Britaniya Kitabxanasının Yaxın Şərq və Mərkəzi Asiya kolleksiyalarının rəhbəri doktor Maykl Ördman tərəfindən Ermənistanın Birləşmiş Krallıqdakı səfirliyinin dəstəyi ilə təşkil olunub.
Ekspozisiyada interaktiv elementlər də yer alır — eksponatların yanında yerləşdirilmiş QR kodlar vasitəsilə ziyarətçilər şifahi tarix müsahibələrindən seçilmiş hissələri dinləyə biləcəklər.
Ermənistanın Birləşmiş Krallıqdakı səfiri Varujan Nersesyan açılış nitqində Maykl Ördmanın və Britaniya Kitabxanasının erməni və britaniya xalqları arasında mövcud dərin və tarixi əlaqələri nümayiş etdirməkdəki rolunu yüksək qiymətləndirib və əməkdaşlığa görə təşəkkürünü bildirib.
Diplomat vurğulayıb ki, “Britanahay” sərgisi iki xalq arasında uzunmüddətli dostluğun və erməni icmasının Britaniya mədəni həyatına verdiyi mühüm töhfənin göstəricisidir.
O, həmçinin qeyd edib ki, mədəni diplomatiya Ermənistan ilə Birləşmiş Krallıq arasında yeni formalaşmış strateji tərəfdaşlığın əsas sütunlarından biridir və xalqlar arasında daha dərin anlayış və əməkdaşlıq üçün körpü rolunu oynayır.
Açılış mərasimində maestro Levon Çilingiryanın rəhbərliyi ilə simli kvartet çıxış edib, daha sonra qəbul mərasimi keçirilib. Tədbirdə mədəni və akademik dairələrin nümayəndələri, diplomatlar və erməni icmasının üzvləri iştirak ediblər.
“Britanahay” sərgisi 2026-cı il fevralın 22-dək açıq olacaq.
