Ermənistan Azərbaycan tərəfi ilə sülh sazişinin imzalanacağı yer və tarix barədə danışıqlara dərhal başlamağa hazırdır, lakin imzalama üçün Azərbaycanın irəli sürdüyü ilkin şərti qəbul etmir.
Alınan məlumata görə, bu barədə parlamentdə jurnalistlərlə söhbətində Ermənistanın Xarici işlər naziri Ararat Mirzoyan bir daha təsdiqləyib.
“Biz bildirmişik ki, danışıqlara bir an öncə başlamağa hazırıq. Elə indi belə, Azərbaycan tərəfi ilə məsləhətləşmələrə başlamağa hazıram ki, harada və nə vaxt bu saziş imzalansın.
Təbii ki, biz Azərbaycan tərəfinin bu məsələ ilə bağlı şərhini və şərtini də bilirik. Biz həmin şərti qəbul etmirik. Onlar bunu həm açıq şəkildə, həm də görüşlərdə bildirirlər.
Biz bunu müzakirə mövzusu kimi görmürük və həmin şərti qəbul etmirik. Ümid edirəm, yaxın vaxtlarda proseslər elə inkişaf edəcək ki, biz sülhün institusionallaşması addımını — imzalanmanı və daha sonra ratifikasiyanı da həyata keçirəcəyik” – deyə nazir qeyd edib.
O, vurğulayıb ki, çoxsaylı komponentlər, məsələlər və iş istiqamətləri mövcuddur – sərhədlərin müəyyənləşdirilməsindən tutmuş humanitar məsələlərə, əsirlərə qədər. “İş çoxdur – təkcə imzalama prosesindən asılı olmayan məsələlər də var” – deyərək Mirzoyan əlavə edib.
Nazirin sözlərinə görə, sülh sazişinin ilkin imzalanması elə bir şəraitdə və elə səviyyədə baş tutub ki, demək olar, bütün dövlətlər, beynəlxalq təşkilatlar və ölkə rəhbərləri bu prosesi alqışlayıblar.
“Ölkə rəhbərləri daima sülhü qorumaq və inkişaf etdirmək öhdəliklərini təsdiqləyirlər. Bu baxımdan, biz istəyirdik ki, sülh imza ilə təsdiqlənsin — bu artıq ilkin imzalama ilə baş verib.
Amma qeyd etdiyim kimi, bu, həm də digər addımların nəticəsidir. Bəlkə bir qədər mübaliğə kimi səslənsin, amma elə bir fikir var ki, bu şəraitdə yekun imzalama artıq prosesin daha çox texniki davamıdır və əlbəttə ki, institusionallaşma mərhələsidir” – deyə Mirzoyan qeyd edib.
Azərbaycan sülh sazişinin yekun imzalanması üçün ATƏT-in Minsk Qrupunun ləğvi və Ermənistan Konstitusiyasının dəyişdirilməsi kimi ilkin şərtlər irəli sürüb.
Minsk Qrupu ilə bağlı məsələ artıq həll olunub. Ermənistan tərəfi dəfələrlə vurğulayıb ki, Konstitusiyanın dəyişdirilməsi məsələsi qarşılıqlı razılaşdırılmış gündəlikdə yoxdur.
Həm Konstitusiyanın dəyişdirilməsi, həm də yeni Konstitusiyanın qəbul edilməsi məsələsi tamamilə Ermənistanın daxili siyasi gündəliyinə və xalqın qərarına aid bir məsələdir.
