Ermənistanın İqtisadiyyat naziri Gevorg Papoyanın rəhbərlik etdiyi nümayəndə heyəti 29-31 oktyabr tarixlərində Almaniyanın paytaxtı Berlində olub.
Bu barədə Ermənistanın İqtisadiyyat nazirliyi məlumat yayıb.
29 oktyabrda nazir 40-dan çox alman sahibkarla görüşüb. Görüşdə həmçinin Almaniyada Ermənistanın səfiri Viktor Yengibaryan və Ermənistanın İqtisadiyyat nazirinin müavini Anuşik Avetyan da iştirak ediblər.
Görüş zamanı nazir Ermənistanın investisiya mühitinin imkanlarını və vasitələrini təqdim edib.
O, xüsusilə kənd təsərrüfatı, energetika, sahibkarlıq, texnologiya və rabitə sahələrində iki ölkə arasında iqtisadi əməkdaşlığa diqqət yetirib.
“Almaniya artıq Ermənistanın vacib iqtisadi tərəfdaşıdır, amma mən əminəm ki, real potensial hələ irəlidədir.
Biz Almaniyadan birbaşa investisiyaları təşviq edərək və infrastruktur, bərpa olunan enerji, su resurslarının idarə edilməsi, kənd təsərrüfatı, innovasiya və texnologiya sahələrində əməkdaşlığı genişləndirərək ticarət və investisiya münasibətlərimizə yeni təkan verməyi hədəfləyirik” — deyə nazir bildirib.
Görüş zamanı o, iştirakçıların suallarına cavab verib və onların təkliflərini dinləyib.
