Ermənistanın beynəlxalq məhkəmələrdə Azərbaycan əleyhinə verdiyi iddiaları geri götürmək barədə müzakirə və ya qərar yoxdur.
Alınan məlumata görə, bu barədə jurnalistlərlə söhbətində Ermənistanın beynəlxalq hüquq məsələləri üzrə nümayəndəsi Karen Andreasyan bildirib.
“Heç mənim, heç əvvəlki rəhbərimin dövründə heç bir iddia geri götürülməyib və belə müzakirə yoxdur. Əgər belə bir şey olarsa, mütləq xəbərdar olacaqsınız.
Mən bütün məhkəmə mübahisələrində Ermənistanı təmsil edirəm — istər Azərbaycanla dövlətlərarası mübahisə, istər arbitraj işi, istərsə də Avropa İnsan Hüquqları Məhkəməsi prosesi olsun.
Bu mənim üçün böyük şərəfdir və mən Ermənistanın maraqlarını ölkəmizin ehtiyaclarına uyğun şəkildə müdafiə edirəm ki, vətəndaşlarımız və onların övladları əlavə maliyyə zərərlərinə məruz qalmasınlar”— deyərək Andreasyan vurğulayıb.
Jurnalistin Vaşinqtonda öncədən imzalanmış sülh sazişində tərəflərin saziş qüvvəyə mindikdən sonra bir-birlərinə qarşı olan iddiaları beynəlxalq məhkəmələrdən geri götürəcəyi barədə şərhinə Andreasyan cavab verib:
“Mən bütün paketi öyrənmişəm. Cənab Yeğişe Kirakosyan və bizim ofisimiz heç bir iddiadan imtina barədə təklif almayıb.
Əgər Ermənistan Respublikası — Hökumət, Parlament və ya Konstitusiya Məhkəməsi hüquqi proseslərin dayandırılmasını nəzərdə tutan hər hansı sazişi ratifikasiya etməyə qərar verərsə, bunu mənimkilərdən əvvəl siz də biləcəksiniz.
Bundan sonra birgə müəyyən edəcəyik ki, hansı hüquqi addımlar tələb olunur” — deyə Andreasyan bildirib.
Andreasyan qeyd edib ki, Ermənistan beynəlxalq platformalarda öz maraqlarını ardıcıl şəkildə müdafiə etməyə davam edir və məhkəmə proseslərindən imtina üçün heç bir əsas yoxdur.
Ermənistan və Azərbaycan arasında öncədən imzalanmış sülh sazişinin 15-ci maddəsində deyilir:
“Saziş qüvvəyə mindikdən sonra bir ay ərzində tərəflər beynəlxalq hüquqi platformalarda təqdim edilmiş hər hansı bütün dövlətlərarası iddiaları, şikayətləri, protestləri, etirazları, prosedurları və mübahisələri geri götürəcək, ləğv edəcək və ya digər şəkildə həll edəcəklər; saziş imzalanmazdan əvvəl tərəflər arasında mövcud olan məsələlərlə bağlı belə iddialar, şikayətlər, protestlər, etirazlar, prosedurlar və mübahisələri irəli sürməyəcəklər və üçüncü tərəflər tərəfindən digər tərəfə qarşı verilən şikayətlərdə, protestlərdə, etirazlarda və prosedurlarda iştirak etməyəcəklər”.
