Aİ-nin genişlənmə siyasəti üzrə ali komissarı Marta Kos əmin edir ki, Ermənistan aviaşirkətlərinin Aİ-nin aviasiya “qara siyahısı”nda qalmaqda davam etməsi siyasi deyil, yalnız texniki məsələdir.
Armenpress-in müxbirinin verdiyi məlumata görə, bunu Marta Kos Brüsseldə bir qrup erməni jurnalistlə görüşü zamanı bildirib.
“Bu, texniki prosesdir, siyasi deyil. Bu məsələ Avropa İttifaqının Uçuşların Təhlükəsizliyi Komitəsinin əlindədir. Onların qiymətləndirməsinə əsasən, Ermənistanın görməli olduğu bəzi işlər var və biz Ermənistanın Mülki Aviasiya Komitəsi ilə əlaqə saxlayırıq. Görülməli olan hər şey edilmədiyinə görə hələ ki, qərar verilməyib. Ona görə də bir daha deyim ki, bu, texniki prosesdir, bunun siyasi münasibətlərlə heç bir əlaqəsi yoxdur, biz sadəcə əmin olmaq istəyirik ki, təhlükəsizlik baxımından hər şey qaydasında olacaq və buna görə də biz Tvinninq prosesində xüsusi yardım təklif etmişik və bu, sonradan maliyyələşdiriləcək. Bu, üzv dövlətlərimizin bu sahədə təcrübəsi olan ekspertlərinin bu məsələdə hökumətinizə kömək etdiyi xüsusi alətdir”, – deyə Marta Kos bildirib.
