Ərazi müdafiə sisteminin formalaşdırılması və ehtiyat qüvvələrin hazırlanması Müdafiə nazirliyinin ən vacib məqsədlərindən biridir.
Verilən məlumata görə, bu haqda Ermənistan Respublikasının Müdafiə naziri Suren Papikyan “Facebook” səhifəsində paylaşdığı videoda bildirib.
Nazir qeyd edib ki, təlim toplanışları təkcə ehtiyat qüvvələr üçün deyil, həm də müddətli hərbi qulluqçular üçün vacibdir və onlara döyüş hazırlığına daha çox diqqət ayırmaq imkanı yaradır.
“Yaxşı məlumatı olanlar bilirlər ki, hər hansı bir ölkənin qarşısında çağırış və ya müharibə vəziyyəti yarandıqda səfərbərlik başlanır.
Bu zaman fəaliyyətdə olan silahlı qüvvələr, şübhəsiz ki, vacibdir və böyük rol oynayır, lakin ordunun əsas potensialı ehtiyat qüvvələr olur” – deyə Papikyan vurğulayıb.
Onun sözlərinə görə, məhz buna görə təlim toplanışlarına yüksək məsuliyyətlə yanaşmaq, onlardan yayınmamaq və fəal iştirak etmək lazımdır.
Müdafiə naziri qeyd edib ki, mümkün 14 günlük döyüş növbətçiliyi təkcə ehtiyatda olan hərbi qulluqçunun vəzifəsi deyil, eyni zamanda müddətli və peşəkar hərbi qulluqçuların daha uzun müddət döyüş hazırlığı ilə məşğul olmalarına imkan yaradan vaxtdır.
