Amerika Birləşmiş Ştatlarının vitse-prezidenti Cey Di Vens, Ermənistana səfərini tarixi bir hadisə olaraq qiymətləndirdi. Alınan məlumata görə, Vens bu haqda Ermənistanın Baş naziri Nikol Paşinyanla görüşdən sonra keçirilən mətbuat konfransında bildirib.
“Bu gün burada baş verənlər tarixi əhəmiyyət daşıyır. Mən həqiqətən də fəxr edirəm ki, Birləşmiş Ştatların ilk vitse-prezidenti kimi bu ölkəyə səfər edirəm. Sabahkı günümü bu ölkədə keçirəcəyim vaxtı gözləyirəm”– deyə Vens bildirib.
ABŞ vitse-prezidenti, əməkdaşlığa görə Ermənistanın baş nazirinə təşəkkür edərək, özünün və ABŞ prezidenti Donald Trampın bu əməkdaşlığı daha da möhkəmləndirməyə sadiq olduqlarını vurğulayıb.
ABŞ vitse-prezidenti Cey Di Vens, 9 fevral tarixində rəsmi səfərlə Ermənistana gəlib. ABŞ vitse-prezidenti öz həyat yoldaşı və uşaqları ilə birlikdə səfər edib. Səfər çərçivəsində Ermənistan Baş naziri Nikol Paşinyan və ABŞ vitse-prezidenti Cey Di Vens arasında təkbətək görüş keçirilib.
