Amerika Birləşmiş Ştatları hökuməti və Ermənistan Respublikası hökuməti nüvə enerjisinin dinc məqsədlərlə istifadəsi sahəsində əməkdaşlıq sazişi üzrə danışıqları başa çatdırıblar. Bu barədə Ermənistandakı ABŞ səfirliyinin bəyanatında deyilir.
“Bu danışıqların başa çatması, 8 avqust 2025-ci ildə Vaşinqtonda imzalanmış Amerika Birləşmiş Ştatları hökuməti və Ermənistan Respublikası hökuməti arasında Enerji Təhlükəsizliyi Tərəfdaşlığı haqqında Anlaşma Memorandumunun əsas elementi kimi, mülki nüvə enerjisi sahəsində ikitərəfli əməkdaşlığın dərinləşdirilməsi məqsədinə çatmaq üçün mühüm addımdır.
Bu saziş enerji təhlükəsizliyi sahəsində ikitərəfli əməkdaşlığı genişləndirəcək, iki ölkə arasında uzunmüddətli diplomatik və iqtisadi münasibətləri gücləndirəcək və nüvə enerjisi sahəsində əməkdaşlıq üçün hərtərəfli hüquqi baza yaradacaq”, – deyə bəyanatda bildirilir.
