Azərbaycan müxalifət xadimi, tarixçi Altay Göyüşov öz Facebook səhifəsində Vaşinqtondakı hadisələr fonunda İlham Əliyevin cangüdənlərinin etirazçılara hücum hallarını şərh edən bir yazı paylaşmışdır.
Göyüşov qeyd edir ki, ictimai diskursda hədə-qorxu və təhqiredici ifadələrlə danışmaq “dəb” halına gəlib.
Onun sözlərinə görə, televiziya verilişlərində və şoularda tez-tez “səni məhv edərəm”, “sənin başına elə oyun açaram təsəvvür etməzsən”,”tikə-tikə doğrayaram” kimi ifadələr eşidilir.
Onun fikrincə, belə danışıq üslubu siyasi hakimiyyətin davranışından qaynaqlanır. Göyüş vurğulayır ki, deputatların və ya yüksək vəzifəli dövlət məmurlarının çıxışlarında zorakılığa çağırış və ya ifrat qiymətləndirmələr səsləndirildikdə, bu, cəmiyyətin digər qatları üçün nümunə olur.
Göyüşov həmçinin iddia edir ki, ölkədə ziyalıların və bəzi ictimai qrupların rolu aşağı salınıb, ictimai mühit isə dərin şəkildə degenerasiyaya uğrayıb.
Yazının sonunda Göyüşov öz qiymətləndirməsini istehza ilə yekunlaşdırır: “Bir sözlə, bu onların dediyi Yeni Azərbaycandır”.
