Ermənistan Respublikasının Prezidenti Vahagn Xaçaturyana, Ermənistanda Fələstin Dövlətinin ilk Fövqəladə və səlahiyyətli səfiri İsa Kassiyeni öz etimadnamələrini təqdim edib.
Alınan məlumata görə, Ermənistan Prezidentinin administrasiyasının yaydığı bəyanatda deyilir ki, Vahagn Xaçaturyan yeni təyin olunan səfiri vəzifəsinin icrası ilə bağlı təbrik edib və onun diplomatik fəaliyyətində uğurlar arzulayıb.
“Siz ilk səfirsiniz və bu, tarixi bir hadisədir. Əminəm ki, bu statusda münasibətlərimiz yeni inkişaf istiqamətləri alacaq və biz birlikdə vəziyyətdən çıxış yolları axtaracağıq.
Bu, həm Fələstində sülhün bərqərar olması, həm də, təbii ki, Ermənistanda və regionumuzda davamlı sülhün təmin edilməsi ilə bağlıdır” — deyə Prezident qeyd edib.
Yeni təyin olunan səfir qəbul və arzular üçün minnətdarlığını bildirib. “Mən Ermənistan və Fələstin arasında ikitərəfli münasibətləri bütün sahələrdə, xüsusilə mədəniyyət, təhsil və səhiyyə sahələrində gücləndirmək üçün maksimum səy göstərəcəyəm. Ümid edirəm ki, yaxın gələcəkdə hər şey Ermənistan və Fələstin üçün çox yaxşı olacaq” — deyərək o, qeyd edib.
Görüş zamanı iki ölkə arasında əməkdaşlığın inkişafı və təşviqi imkanları müzakirə edilib, siyasi dialoqun aktivləşdirilməsi və müxtəlif sahələrdə qarşılıqlı əməkdaşlığın genişləndirilməsinə xüsusi diqqət yetirilib.
Xüsusilə, humanitar sahədə təcrübə mübadiləsi imkanlarına toxunulub. Bu kontekstdə Ermənistan Prezidenti, ölkənin humanitar məsələlərdə topladığı təcrübə və qabiliyyətlərini nəzərə alaraq, lazımi dəstəyi göstərməyə hazır olduğunu vurğulayıb.
Tərəflər həmçinin regional vəziyyətə də toxunublar, sülh, sabitlik və yaxınlıq prinsipləri ilə rəhbərləşməyin vacibliyini qeyd ediblər.
