Atıcılıq üzrə Beynəlxalq Federasiyanın prezidenti Luçiano Rossi Yerevanda keçirilən Avropa çempionatının təşkilat səviyyəsindən təsirləndiyini bildirib.
“Burada, Yerevanda bizə möhtəşəm qəbul göstərilir. Ermənistana, baş nazirə, Ermənistan Atıcılıq Federasiyasına təşəkkür edirəm. Həqiqətən böyük və keyfiyyətli iş görülüb. Avropa çempionatını burada ilk dəfə keçiririk və ümid edirəm ki, bu sonuncu olmayacaq” – deyə Rossi jurnalistə müsahibəsində bildirib.
Beynəlxalq federasiyanın prezidenti Avropa çempionatının açılış mərasimindən də təsirləndiyini vurğulayıb. Onun sözlərinə görə, mərasim tamamilə Avropa ruhu ilə zəngin idi.
“Mənim üçün şəxsən bu çox böyük əhəmiyyət daşıyır. Biz burada keçirilən turnirin nə qədər yaxşı təşkil olunduğunu səmimi şəkildə qiymətləndiririk. Xoş təəccüb içindəyəm. Ermənistan Atıcılıq Federasiyasının prezidenti Artur Hovhannisyan və baş katib Areq Saribekyanla qardaşcasına, səmimi münasibətlərimiz var” – deyə o, qeyd edib.
Gələcəkdə Ermənistanda dünya çempionatının keçirilməsi imkanına toxunan Rossi bunun gələcəkdə mümkün olduğunu hesab etdiyini vurğulayıb.
