Ermənistanın Xarici işlər naziri Ararat Mirzoyan bildirib ki, bölgələrə səfərlər zamanı vətəndaşlarla görüşlərdən belə nəticə çıxarıblar ki, insanlar sülh gündəliyini dəstəkləyir və aparılan xarici siyasəti qiymətləndirirlər.
Alınan məlumata görə, Mirzoyan bu haqda Şirak vilayətinə səfəri zamanı, Baş nazir Nikol Paşinyanın vətəndaşlarla görüşlərlə bağlı sualını cavablandırarkən deyib.
Mirzoyan qeyd edib ki, səfərlər zamanı ən azı bir neçə vətəndaş ona yaxınlaşaraq görülən işlərə görə təşəkkür edib.
“Sizcə bundan böyük qiymət ola bilərmi, cənab Baş nazir?” – deyə o, bildirib.
Nikol Paşinyan isə qeyd edib ki, əvvəlki regional səfərlər zamanı vətəndaşların sualları əsasən regiondakı vəziyyət və Ermənistan ətrafındakı geosiyasi proseslərlə bağlı olurdu, lakin indi suallar daha çox uşaq bağçaları və gündəlik problemlərlə bağlıdır.
Baş nazir bunun vətəndaşların sülhün mövcudluğunu hiss etməsi ilə bağlı olduğunu vurğulayıb.
Xarici işlər naziri əlavə edib ki, insanlar bölgədə baş verən hadisələri nəzərə alaraq sülhün əhəmiyyətini xüsusi vurğulayırlar.
“Biz bir daha əmin olduq ki, Ermənistan vətəndaşları həqiqətən sülh gündəliyini, demokratik islahatları və Avropa Birliyi ilə münasibətlərin dərinləşdirilməsini dəstəkləyir” – deyə Ararat Mirzoyan bildirib.
Xatırladaq ki, Ermənistanın baş naziri Nikol Paşinyan martın 7-də “Mülki Müqavilə” partiyasının bir qrup üzvü ilə birlikdə Araqatsotn və Şirak vilayətlərinə səfər edib və müxtəlif yaşayış məntəqələrində vətəndaşlarla çoxsaylı görüşlər keçirib.
Baş nazir Araqatsotn vilayətinin Aştarak və Talin şəhərlərində, Şirak vilayətinin Maralik, Pemzaşen, Artik icmalarında, həmçinin Gümrü şəhərində dayanacaqlar edib.
