Omanın rəsmi səfəri çərçivəsində, martın 17-də Maskatda Ermənistanın xarici işlər naziri Ararat Mirzoyan Oman Sultanlığı xarici işlər naziri Badr bin Hamad bin Hamud Al-Busaid ilə görüşüb.
Alınan məlumata görə, Ermənistan Xarici İşlər nazirliyi bildirib ki, tərəflər Ermənistan və Oman arasında əməkdaşlığın inkişafı məsələlərini geniş şəkildə müzakirə ediblər.
Oman XİN naziri Ermənistan XİN nazirinin bölgədə mövcud mürəkkəb vəziyyətə baxmayaraq Maskata səfər etmə qərarını yüksək qiymətləndirib və bu səfəri tarixi hesab edib.
Ararat Mirzoyan isə səfərin təşkili və xüsusilə Ermənistanın rezident səfirliyinin açılması məsələsində göstərilən hazırlıq və dəstəyə görə minnətdarlığını bildirib, səfərin Ermənistanın Oman və ümumilikdə region ölkələri ilə çoxşaxəli əlaqələri inkişaf etdirməyə olan böyük marağını əks etdirdiyini vurğulayıb.
Tərəflər həmçinin qeyd ediblər ki, Ermənistanda rezident səfirliyin açılması ilə bağlı qərar iki ölkə münasibətlərinin daha da dərinləşməsi yolunda vacib bir mərhələdir.
Ermənistan və Oman arasında ikitərəfli gündəliyin məzmun baxımından zənginləşdirilməsi və mövcud potensialın tam reallaşdırılması məqsədilə Ararat Mirzoyan və Badr bin Hamad bin Hamud AB-Busaid bir sıra qarşılıqlı maraq doğuran sahələrdə əməkdaşlığın inkişaf perspektivlərini müzakirə ediblər.
Bu kontekstdə iqtisadiyyat, ticarət, təhsil və mədəniyyət sahələrində hüquqi baza və konkret təşəbbüslərin həyata keçirilməsi istiqamətində fikir mübadiləsi aparılıb.
Həmçinin insanlarla əlaqələrin təşviqi baxımından viza tələbinin ləğvi və daimi əsaslarla birbaşa reyslərin açılmasının əhəmiyyəti vurğulanıb.
Görüş zamanı nazir Mirzoyan fevralın 28-dən etibarən Maskat-Yerevan səkkiz birbaşa reysin təşkilində effektiv əməkdaşlığa görə minnətdarlığını bildirib, bu reyslər vasitəsilə təxminən 550 Ermənistan vətəndaşı ölkəyə qayıdıb.
Ararat Mirzoyan və Badr bin Hamad bin Hamud Al-Busaid Yaxın Şərqdə yaranmış vəziyyəti də müzakirə ediblər və bunun həllində diplomatiyanın üstünlük təşkil etməsinin vacibliyi vurğulanıb.
Şəhər obyektlərinin hədəf alınması və nəticədə baş verən tələfatla bağlı narahatlıq ifadə olunub.
Sülhün vacibliyini vurğulayan nazir Mirzoyan həmkarına Ermənistan və Azərbaycan arasında sülhün daha da institusionallaşması istiqamətində atılan addımları təqdim edib.
Nazir Mirzoyan Oman XİN-in qonaqlar kitabında belə bir qeyd edib:
“Mənim üçün böyük şərəfdir ki, Ermənistan Respublikasının ilk Xarici işlər naziri kimi Oman Sultanlığına səfər etmişəm – bu ölkə diplomatiyaya dərin inanan və sülhün təşviqçisi olan bir dövlətdir”.
.
