Ermənistandakı ali təhsil müəssisələrində 2025-ci ildə xarici tələbələrin sayı 2021-ci illə müqayisədə 67 faiz artıb. Alınan məlumata görə, bu barədə Ermənistanın təhsil, elm, mədəniyyət və idman naziri Janna Andreasyan parlamentin elm və təhsil məsələləri komissiyasının iclasında, Ermənistan hökumətinin 2021–2026-cı illər proqramının 2025-ci il üzrə icrası və nəticələri haqqında hesabatı təqdim edərkən bildirib.
“Keçən il ali təhsil müəssisələrində xarici tələbələrin cəlb olunması istiqamətində vacib bir iş görmüşdük. Bunun sayəsində rəqəmsal platforma vasitəsilə xarici tələbələrin qəbulu həyata keçirildi.
Bu, nəticədə xarici vətəndaşların ərizələrinin sayı əvvəlki illə müqayisədə 90 faiz artmasına, 2021-ci illə müqayisədə isə xarici tələbələrin ümumi sayının 67 faiz artmasına səbəb oldu.
Bu o deməkdir ki, alətlər düzgün və uyğun olduqda, cəlbedicilik artır” – deyə nazir bildirib.
2025-ci ildə Ermənistandakı ali təhsil müəssisələrinə 10 970 birinci kurs tələbəsi qəbul olunub, onların 59 faizi BTÇM (təbiət, texnologiya, mühəndislik və riyaziyyat) istiqamətləri üzrədir.
Nazir xatırladıb ki, üstün istiqamətlər üzrə təqaüd proqramları mövcuddur. Bu səbəbdən həmin istiqamətlərdə tələbələrin sayında əhəmiyyətli artım müşahidə olunur.
