Rusiya energetika sahəsində Ermənistanla əməkdaşlığı davam etdirməyə ümid edir.
Bu barədə Rusiyanın ER-kı səfirliyinin müşaviri Dmitri Litskaya martın 19-da Rus Evi tərəfindən, Rusiya-Ermənistan Universitetinin Şərqşünaslıq İnstitutu və Ermənistan Şərqşünaslar birliyi “Ex Oriente” ilə birgə təşkil olunmuş “BRICS+ atom enerjisi sahəsində əməkdaşlıq” konfransında bildirib.
Onun sözlərinə görə, hazırda Ermənistanda yeni enerji blokunun tikintisi imkanları fəal şəkildə müzakirə olunur.
Diplomat qeyd edib ki, “Rosatom” müasir təhlükəsizlik və ətraf mühit standartlarına uyğun olaraq, ən yüksək səviyyədə atom enerjisi istehsalı ilə erməni tərəfdaşlarını təmin etməyə davam etməyə hazırdır.
Nümunə kimi o, Metsamorda yerləşən Ermənistan Atom Elektrik Stansiyasının istismarını göstərib. Stansiya Rusiyanın “Rosatom” şirkəti tərəfindən servis olunur. Litskaya bildirib ki, hazırda stansiyanın istismar müddətinin uzadılması istiqamətində işlər aparılır.
“Rosatom çalışır ki, stansiya ən yüksək keyfiyyət standartlarına uyğun fəaliyyət göstərsin. Ermənistanın seysmik zonada yerləşməsi də nəzərə alınır.
Bütün bunlar ona görə edilir ki, stansiya Ermənistanın inkişafı üçün sabitləşdirici və güclü enerji dayağı kimi fəaliyyətini davam etdirsin və ölkə öz nüvə enerjisi istehsalına əsaslanaraq iqtisadi inkişafını planlaşdıra, proqramları üçün sosial-iqtisadi təminat yarada bilsin” — deyə Litskaya bildirib.
Onun sözlərinə görə, Rusiya öz işləmələrini BRICS ölkələri ilə bölüşməyə hazırdır.
“Artıq BRICS-in bir sıra ölkələrində atom elektrik stansiyaları tikilir və yeni layihələr müzakirə olunur.
Bundan əlavə, əməkdaşlıq tərəfdaşlıq prinsipləri əsasında qurulur, heç bir siyasi təzyiq və ya konkret qərarların zorla qəbul etdirilməsi olmadan” — deyə səfirliyin nazir-müşaviri vurğulayıb.
Litskaya əmin edib ki, Rusiya sənayedə aparıcı mövqeyini qoruyaraq BRICS ölkələrinin inkişafı üçün etibarlı enerji mənbələrinə malik olmasında maraqlıdır.
“Bu, qarşılıqlı ticarətin artmasına, iqtisadi müstəqilliyin möhkəmlənməsinə və qlobal energetika sahəsində sabitliyin yüksəlməsinə kömək edir” — deyə səfirliyin nümayəndəsi qeyd edib.
BRICS+ atom enerjisi əməkdaşlığının məqsədi dayanıqlı və aşağı karbonlu enerji mənbələrinin inkişafı, texnologiyaların mübadiləsi və birgə layihələrin həyata keçirilməsidir.
Bu prosesdə Rusiya (“Rosatom”) əsas rol oynayır. İştirakçı ölkələrdə qabaqcıl nüvə texnologiyalarının tətbiqi üçün ixtisaslaşmış Atom Enerjisi Platforması yaradılıb.
Diqqət mərkəzində dinc nüvə energetikası, atom elektrik stansiyalarının tikintisi və nüvə təbabəti dayanır.
