Parlamentdə Ermənistan üçün Avropa Birliyi tərəfindən ayrılan maliyyə yardımının həcmi və onun istifadə prosesi müzakirə olunub.
Alınan məlumata görə, parlamentin Avropa inteqrasiyası məsələləri üzrə daimi komissiyasının iclasında “Hayastan” fraksiyasının deputatı Armen Gevorgyan xatırladıb ki, son illərdə müxtəlif platformalarda təxminən 3 milyard avro məbləğində yardım elan edilib.
Bu məbləğə 2,6 milyard avroluq iqtisadi və investisiya paketi, 270 milyon avroluq proqram və yaxın zamanda elan edilmiş əlavə 140 milyon avro daxildir.
Deputat sual qaldırıb ki, bu vəsaitlərin əslində nə qədəri Ermənistana çatıb və iqtisadiyyatda necə əks olunub.
Maliyyə naziri Vahe Hovhannisyan cavab verib ki, bir sıra proqramlar həyata keçirilir və onların böyük hissəsi infrastruktur layihələrinə aiddir.
“Bir çox proqram həyata keçirmişik, əsas böyük hissə Şimal–Cənub avtomobil yolunun maliyyələşdirilməsinə aiddir” – deyə Hovhannisyan bildirib və əlavə edib ki, hazırda Syünik bölgəsinin dayanıqlığı və digər proqramlar da icra olunur.
Xarici işlər nazirinin müavini Vahan Kostanyan daha konkret rəqəmlər təqdim edərək bildirib ki, 2,6 milyard avroluq iqtisadi və investisiya paketindən artıq 1 milyard 496 milyon avro bölüşdürülüb.
Onun sözlərinə görə, “Dayanıqlılıq və inkişaf” proqramı çərçivəsində nəzərdə tutulan 270 milyon avrodan artıq 62,5 milyon avro xərclənib, təxminən 210 milyon avronun isə ayrılması təsdiqlənib.
Müzakirə zamanı investisiyaların keyfiyyət təsirinə də toxunulub. Gevorgyan maraqlanıb ki, bu proqramlar Ermənistanın iqtisadi strukturuna necə təsir edir.
Maliyyə naziri Vahe Hovhannisyan bildirib ki, kapital qoyuluşları orta hesabla ÜDM-in artımına təxminən 1,4 əmsal təsir göstərir, lakin hər bir layihə ayrıca texniki-iqtisadi araşdırmalar əsasında qiymətləndirilir.
“Əgər, məsələn, Avropa Birliyi ilə birlikdə həyata keçirdiyimiz layihələrdən danışsaq, şübhəsizdir ki, hazırda Şimal–Cənub yolunun cənub hissəsinin tikintisi istiqamətində görülən işlər ‘Sülh kəsişməsi’ təşəbbüsünün həyata keçirilməsi baxımından da mühüm təsir göstərəcək.
Düşünürəm ki, bunlar həm iqtisadi, həm də strateji baxımdan vacib layihələrdir, lakin onların tam təsiri yalnız infrastruktur faktiki olaraq qurulduqdan sonra görünəcək.
Eyni hal Syünik bölgəsinin dayanıqlılığı proqramına da aiddir. Bu proqram çərçivəsində uşaq bağçaları, xəstəxanalar, su sistemləri və digər müxtəlif infrastrukturların yaradılması nəzərdə tutulur” – deyə Hovhannisyan vurğulayıb.
Kostanyan isə əlavə edib ki, AB-nin dəstəyi standartların və institusional infrastrukturun inkişafını da əhatə edir və bu, orta və uzunmüddətli perspektivdə daha nəzərəçarpan nəticələr verə bilər.
