ABŞ prezidenti Donald Trampın administrasiyası “Trampın Beynəlxalq Sülh və Rifah üçün Yolu” (TRIPP) layihəsini reallaşdırmaq öhdəliyinə sadiq qalır.
Jurnalistin sorğusuna cavab olaraq bunu ABŞ Dövlət Departamentinin sözçüsü bildirib.
“TRIPP ABŞ-ın prioritetlərindən biri olaraq qalır, çünki onun Cənubi Qafqazda və ondan kənarda sülhü və rifahı təşviq etmək potensialı var. Tramp administrasiyası TRIPP-i reallaşdırmaq öhdəliyinə sadiq qalır”– deyə ABŞ Dövlət Departamentinin sözçüsü qeyd edib .
ABŞ Dövlət Departamentinin sözçüsü xatırladıb ki, layihə Azərbaycanın əsas ərazisi ilə Naxçıvanı birləşdirəcək multimodal nəqliyyat qovşağı yaratmağı nəzərdə tutur – eyni zamanda Ermənistanın suverenliyinə, ərazi bütövlüyünə və yurisdiksiyasına hörmət edərək və Ermənistan üçün qarşılıqlı faydaları təmin etməklə.
“TRIPP regionda beynəlxalq və daxili maneəsiz əlaqələri təmin edəcək, iqtisadi artım və rifahın yüksəldilməsi imkanlarını genişləndirəcək” –ABŞ Dövlət Departamentinin sözçüsü qeyd edib.
ABŞ Dövlət Departamentinin sözçüsünün sözlərinə görə, Azərbaycan Naxçıvanla əlaqə əldə edəcək, Ermənistan isə regional əlaqələrin yaxşılaşmasından faydalanacaq – bu, Ermənistanın suverenliyini, ərazi bütövlüyünü və yurisdiksiyasını qoruyaraq Cənubi Qafqazın iqtisadi potensialını açacaq.
ABŞ Dövlət Departamentinin sözçüsü həmçinin məlumat verib ki, Ermənistan ABŞ və qarşılıqlı razılıqla seçilmiş üçüncü tərəflərlə TRIPP təşəbbüsünün həyata keçirilməsi istiqamətində əməkdaşlıq edir.
“TRIPP-in və əlaqədar sazişlərin başlanmasını dəstəkləmək məqsədilə ABŞ 145 milyon dollar ilkin öhdəlik götürüb ki, bu da regional sabitlik və iqtisadi artımı açacaq.
Bu vəsaitlər Ermənistanda ticarət, infrastruktur və sərhəd təhlükəsizliyi sahələrində investisiyaları dəstəkləyəcək və regional əlaqələri artıracaq” – deyə ABŞ Dövlət Departamentinin sözçüsü bildirib.
ABŞ Dövlət Departamentinin sözçüsü həmçinin qeyd edib ki, 2026-cı il yanvarın 13-də ABŞ və Ermənistan birgə TRIPP-in həyata keçirilməsi çərçivəsinin dərc olunduğunu elan ediblər.
“Sənəd TRIPP-in işə salınması üçün aydın yol xəritəsini təqdim edir. 2025-ci il avqustun 8-də təsdiq edilmiş prinsipləri əks etdirməklə, o, həmçinin suverenliyin, yurisdiksiyanın, ərazi bütövlüyünün və qarşılıqlılığın TRIPP-in ümumi uğuru üçün əhəmiyyətini vurğulayır.
ABŞ prezidenti Donald Trampın qeyd etdiyi kimi, TRIPP ‘dünyada iqtisadi baxımdan ən vacib yerlərdən bəzilərindən keçəcək’ və “Xəzər dənizinin o tayında ticarət fəallığını təşviq edərək Mərkəzi Asiya ölkələrinə kömək edəcək”.
TRIPP-in son məqsədləri Ermənistan və Azərbaycanın rifahını və təhlükəsizliyini möhkəmləndirmək, regional ticarət və əlaqələri inkişaf etdirərək ABŞ-ın ticarət imkanlarını genişləndirmək, habelə Mərkəzi Asiyadan və Xəzər regionundan Avropaya yeni tranzit əlaqələri yaratmaqdır” – deyə ABŞ Dövlət Departamentinin sözçüsü yekunlaşdırıb.
