Ermənistan Ermənistanla Azərbaycan arasında sülhün bərqərar olması ilə əlaqəli olan iqtisadi inkişafın tamamilə yeni mərhələsinə qədəm qoyur. Bunu Ermənistan Respublikasının Baş naziri Nikol Paşinyan iş adamları ilə görüşündə bildirib.
“Yaxın gələcəkdə böyük hadisələr gözləyirik ki, bunlar, ilk növbədə, Ermənistan Respublikasını blokadadan tamamilə çıxaracağı baxımından vacibdir. Amma əslində, bu gün Ermənistan blokadanı aşıb, çünki bilirsiniz ki, Azərbaycan ərazisindən Ermənistana dəmir yolu ilə yük daşımaları həyata keçirmək mümkündür və həyata keçirilir, amma mən onu da demək istəyirəm ki, ixrac, əlbəttə ki, Gürcüstan ərazisindən dəmir yolu ilə də mümkündür, halbuki biz əvvəlcə TRIPP layihəsi çərçivəsində Azərbaycanla dəmir yolunu açacağıq. Bu, çox vacibdir və siyasi razılaşma ondan ibarətdir ki, bu dəmir yolu heç vaxt bağlanmayacaq. Başqa sözlə, bu, həm idxal, həm də ixrac üçün etibarlı bir marşrutdur”, – Baş nazir bildirib.
