2026-cı il aprelin 10-12-də Azərbaycanın Qəbələ şəhərində “Sülh körpüsü” təşəbbüsü çərçivəsində Azərbaycan və Ermənistan vətəndaş cəmiyyəti nümayəndələrinin iştirakı ilə ikitərəfli dəyirmi masa keçirilib.
Görüşdə hər iki ölkənin ictimai təşkilatlarının, media qurumlarının və analitik mərkəzlərinin nümayəndələri iştirak ediblər, bu barədə Ermənistan tərəfi məlumat verib.
Ermənistan nümayəndə heyəti Azərbaycana quru sərhədi vasitəsilə, rəsmi şəkildə delimitasiya və demarkasiya olunmuş hissədən keçərək, sərhəd və pasport nəzarətinin bütün müvafiq prosedurlarından keçməklə daxil olub.
Bu sərhəd keçidi özü də “Sülh körpüsü” təşəbbüsü tərəfindən Azərbaycan və Ermənistan cəmiyyətləri arasında etimadın möhkəmləndirilməsinə yönəlmiş növbəti simvolik addım olub.
İki gün ərzində dörd müzakirə sessiyası keçirilib. İştirakçılar Cənubi Qafqazda və onun ətrafında baş verən geosiyasi prosesləri və onların sülh prosesinə təsirini müzakirə ediblər.
Azərbaycanlı və erməni ekspertlər həmçinin regional inkişaflarla bağlı hər iki ölkənin müvafiq mövqeləri və baxışları ətrafında fikir mübadiləsi aparıblar.
İkitərəfli dialoq başlamazdan əvvəl “Sülh körpüsü” təşəbbüsünün nümayəndələri öz ölkələrində vətəndaş cəmiyyətinin müxtəlif təbəqələri ilə görüşlər və müzakirələr keçirərək, sülh prosesi ilə bağlı ictimai gözləntiləri və qavrayışları daha yaxşı anlamağa çalışıblar.
Ayrı bir sessiya zamanı təşəbbüs iştirakçıları bu görüşlərin nəticələrini təqdim edərək, cəmiyyətlərində mövcud əsas narahatlıqları, gözləntiləri və baxışları üzə çıxarıblar.
Bu ictimai gözləntiləri nəzərə alaraq, iştirakçılar yekun sessiyanı sülh prosesinin növbəti mərhələlərində atılacaq birgə və fərdi addımların müzakirəsinə həsr ediblər.
Aprelin 11-də “Sülh körpüsü” təşəbbüsünün dördüncü ikitərəfli dəyirmi masasının iştirakçılarını Azərbaycan Respublikası Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev qəbul edib.
Müzakirənin mərkəzində regional təhlükəsizlik, siyasi səviyyədə sülh prosesinin gedişi və vətəndaş cəmiyyətinin münasibətlərin normallaşmasına töhfəsi dayanıb. İki günlük dialoq mətbuat konfransı ilə başa çatıb və burada dördüncü görüşün nəticələri ümumiləşdirilib.
Vətəndaş cəmiyyəti nümayəndələrinin bu görüşü konstruktiv dialoq və səmimi müzakirələr şəraitində keçib və sülh gündəliyinə alternativin olmadığı fikrini bir daha təsdiqləyib.
Azərbaycan və Ermənistan hökumətlərinin dəstəyi ilə “Sülh körpüsü” təşəbbüsü çərçivəsində təşkil olunan dialoq iştirakçıları sülh prosesinin növbəti mərhələlərində etimadın möhkəmləndirilməsi istiqamətində birgə səyləri davam etdirmək niyyətlərini bir daha bəyan ediblər.
