“Sülh körpüsü” təşəbbüsü, Ermənistan-Azərbaycan münasibətlərində sülh gündəliyinin təşviqinə yönəlmiş mövcud tarix və narativlərlə yanaşı, yeni yanaşmalar və imkanlar formalaşdırmağı hədəfləyir.
“Armenpress”-in məlumatına görə, bu barədə “Erməni Şurası” Analitik Mərkəzinin prezidenti, Təşəbbüsün koordinatoru Areq Koçinyan məlumat verib. 10-12 aprel 2026-cı il tarixlərində Azərbaycanın Qəbələ şəhərində keçirilən görüşün nəticələrini yekunlaşdıran mətbuat konfransında Koçinyan qeyd edib ki, təşəbbüs çərçivəsində dördüncü görüş artıq baş tutub və bu, onun fikrincə, özlüyündə mühüm nailiyyətdir.
“Düşünürəm ki, 4-cü görüşün bu formatda keçirilməsi və görüşlərin davam etdirilməsi barədə razılığın olması artıq böyük nailiyyətdir”, – deyə o bildirib. Koçinyanın sözlərinə görə, çoxsaylı çətinliklərə və tənqidlərə baxmayaraq, qarşılıqlı səfərlər sülh gündəliyinin irəliləməsinə töhfə verir.
“Bu səfərlərin baş tutmamasının yüzlərlə səbəbini sadalaya bilərik, amma onların baş tutmasının bir əsas səbəbi var: onlar Ermənistan və Azərbaycan cəmiyyətləri arasında sülhün bərqərar olmasına töhfə verirlər”, – deyə o vurğulayıb.
Onun sözlərinə görə, görüşlər çərçivəsində tərəflər dövlət rəsmiləri ilə də ünsiyyət qurublar və onlar sülh prosesinin artıq başladığını bildiriblər.
“Biz əminik ki, Ermənistan və Azərbaycan arasında artıq sülh mövcuddur və bu, dərinləşmə və genişlənmə prosesindədir”, – deyə o qeyd edib. Eyni zamanda, Koçinyan təşəbbüsün keçmişi yenidən nəzərdən keçirmək və ya unutmaq məqsədi daşımadığını vurğulayıb.
“Sülh Körpüsü” təşəbbüsü keçmişi unutmaq və ya inkar etmək deyil. “Bu, mövcud naratlivlərlə yanaşı yeni narativlər və yeni imkanlar yaratmaqdır”, – deyə o bildirib. Koçinyan həmçinin vurğulayıb ki, bu cür təşəbbüslər sürətli nəticələrə zəmanət verə bilməz, lakin onların olmaması sülhə nail olmaq imkanını istisna edəcək.
