Rusiya prezidenti Vladimir Putinin və onun administrasiya nümayəndələrinin son bəyanatları Ermənistanın suverenliyinə birbaşa təhdiddir. Vanadzor ofisinin rəhbəri Artur Sakunts “Factor TV”-yə müsahibəsində belə bir rəy bildirib.
Onun sözlərinə görə, Kreml artıq mövqeyini gizlətmir: Ermənistana bərabərhüquqlu tərəfdaş kimi deyil, tabe olan bir dövlət kimi baxır və müstəqil xarici siyasət yürütmək istiqamətində istənilən cəhdin qarşısını almağa çalışır.
Sakunts Kremldən gələn mesajları təhlil edərək, onları Ermənistanın daxili işlərinə kobud müdaxilə kimi qiymətləndirir.
Artur Sakunts hesab edir ki, Vladimir Putin Ermənistanın SSRİ-nin dağılmasından sonra da Rusiyanın təsir dairəsində qalması məntiqi ilə hərəkət edir.
“Əslində, Putin bir çox dövlətlərarası müqavilələrdə təsbit olunmuş və ən azı 2022-ci ilə qədər Ermənistanın Sovet İttifaqı dağıldıqdan sonra Rusiya Federasiyasına tabe olan bir dövlət kimi qaldığı və ya formalaşdığı prinsipindən çıxış edir” – deyə hüquq müdafiəçisi bildirib.
Onun sözlərinə görə, Putinin və digər Rusiya rəsmilərinin, xüsusən Ermənistanın AB ilə yaxınlaşmasının mümkün mənfi nəticələri barədə bəyanatları birbaşa təhdiddir:
“Bu nə deməkdir? Bu o deməkdir ki, əgər siz müstəqil addımlar atsanız və ya Rusiya imperiyasının təsiri altından çıxmağa qərar versəniz, bunun nəticələri olacaq.
Çox sadə dillə desək: Ermənistan, əgər sən Rusiya Federasiyasından müstəqil olmaq istəyirsənsə, bu müstəqillik və ya müstəqillik canatması üçün ağır bədəl ödəyə bilərsən”.
Hüquq müdafiəçisinin fikrincə, Ermənistandakı “ruspərəst qüvvələrə” dəstək haqqında açıq danışıqlar kobud müdaxilədir. O qeyd edir ki, Kreml öz təsirini “İvanişvili modeli” vasitəsilə saxlamağa çalışır:
“İvanişvili vəzifə tutmur, Baş nazir deyil, amma de-fakto Gürcüstanı o idarə edir. İndi Ermənistanda da belə bir model formalaşa bilər”.
Sakunts Rusiyanın təzyiq rıçaqı kimi istifadə etdiyi əsas alətləri sadalayır: qaz tədarükü, nəqliyyat yolları, Ermənistan dəmir yollarının konsessiya idarəçiliyi və nüvə asılılığı.
“Ermənistanın əvvəlki hakimiyyət orqanlarının zamanla təhvil verdiyi və ya formalaşdırdığı bu asılılığı o (Putin), hazırda bir təhdid aləti kimi açıq şəkildə nümayiş etdirir”– deyə Sakunts qeyd edir.
Hüquq müdafiəçisinin sözlərinə görə, Ermənistan hazırda seçim qarşısındadır və bu seçimin öz qiyməti var:
“Biz vətəndaşlarla dürüst olmalı və deməliyik: bəli, Lars (keçid məntəqəsi) bağlana bilər, qaz tədarükü ilə bağlı problemlər yarana bilər.
Lakin qaz tədarükü ilə bağlı biz İran və ya Türkmənistan qazının idxalına çalışacağıq və ya buna nail olacağıq. Yəni, “B planı” olmalıdır. Ya biz tabe oluruq, ya da azad oluruq. Budur məsələ, başqa alternativ yoxdur”.
