Jamestown Fondunun hesabatına görə, İran ətrafındakı mümkün münaqişədə kürd faktoru TRIPP layihəsinin icrasını təhlükə altına sala və sərhədyanı bölgələrdə qüvvələr nisbətini dəyişərək Türkiyə və Azərbaycanın maraqlarına təsir göstərə bilər.
Nəşrin məlumatına görə,Türkiyə və Azərbaycan, İran ətrafındakı münaqişə kontekstində kürd silahlı qruplaşmalarının mümkün güclənməsini regional qeyri-sabitliyin əsas amili və öz təhlükəsizliklərinə potensial təhdid kimi nəzərdən keçirirlər.
Hər iki ölkə preventiv şəkildə öz mövqelərini koordinasiya edir və İranın sərhəd bölgələrində, eləcə də qonşu dövlətlərdə kürd fəaliyyətinin genişlənməsi risklərinə nəzarət edir.
Məqalədə qeyd olunur ki, Ankara İran ətrafındakı gərginliyin əvvəlindən bəri Şimali İraqda və ya İranda kürd silahlı amilinin ortaya çıxmasını öz milli təhlükəsizliyinə birbaşa təhdid kimi qəbul edəcəyini bəyan edib.
Türkiyə, bölgəni qeyri-sabitləşdirə biləcək bir kürd üsyanı kəskinləşərsə, Şimali İraqa hərbi müdaxilə imkanını istisna etmir.
Vurğulanır ki, silahlı kürd qüvvələrinin prosesə cəlb olunması Türkiyə üçün “qırmızı xətt” olaraq qalır.
Eyni zamanda, Azərbaycanın narahatlığı ondan ibarətdir ki, İranın şimal-qərbində kürd fəaliyyətinin aktivləşməsi ölkə daxilində etnik gərginliyi artıra və İranın azərbaycanlı əhalisinə təsir edə bilər.
Bakı xüsusilə həm azərbaycanlı, həm də kürd icmalarının cəmləşdiyi Qərbi Azərbaycan əyalətinə diqqət yetirir. Bu ərazidəki qeyri-sabitlik azlıqların təhlükəsizliyinə, həmçinin Azərbaycanı Naxicevan və Türkiyə ilə birləşdirən strateji nəqliyyat layihələrinə zərər vura bilər.
Nəticə olaraq, Bakı üçün əsas məsələ kommunikasiyalara nəzarət və yolların sabitliyidir, Türkiyə üçün isə prioritet sərhədlərdə silahlı kürd strukturlarının yaranmasının qarşısını almaqdır. Bu risklərə qarşı hər iki ölkə hərbi koordinasiyanı, o cümlədən birgə təlimləri gücləndirir.
